Sunday, February 10, 2019

തകര്‍ത്തു..! പൊളിച്ചു..! തിമിര്‍ത്തു..! അടിപൊളി..!

      ഇന്നലെ നടന്ന (ഫെബ്രുവരി 9, രണ്ടാം ശനി) പൂഞ്ഞാര്‍ സെന്റ് ആന്റണീസ് ഹയര്‍ സെക്കന്‍ഡറി സ്കൂളിലെ UP വിഭാഗം കുട്ടികളുടെ പഠനോത്സവവും അഞ്ചുമുതല്‍ എട്ടുവരെ ക്ലാസുകളിലെ കുട്ടികളുടെ ടാലന്റ്സ് ഡേ ആഘോഷവും വിശേഷിപ്പിക്കാന്‍ തലക്കെട്ടിലെ വാക്കുകള്‍ ഉപയോഗിക്കുന്നതില്‍ ഒരു അതിശയോക്തിയുമില്ല. അത്ര ഉജ്ജ്വലമായിരുന്നു കുട്ടികളുടെ പ്രകടനം.
    രാവിലെ പത്തുമുതല്‍ വൈകിട്ട് നാലുവരെ നടന്ന വിവിധ പരിപാടികളില്‍ നാനൂറോളം കുട്ടികള്‍  മികവാര്‍ന്ന പ്രകടനങ്ങള്‍ കാഴ്ചവച്ചു. വിവിധ ഭാഷകളിലുള്ള സ്കിറ്റുകള്‍, മൂകാഭിനയം, ശാസ്ത്ര-ഗണിതശാസ്ത്ര-സാമൂഹ്യശാസ്ത്ര-പ്രവൃത്തിപരിചയ വിഷയങ്ങളുമായി ബന്ധപ്പെട്ട അവതരണങ്ങള്‍, നാടന്‍പാട്ടുകള്‍, പ്രഭാഷണങ്ങള്‍, കവിതകള്‍, ക്വിസ് തുടങ്ങിയ ഇനങ്ങള്‍ വേദിയില്‍ അരങ്ങേറിയപ്പോള്‍  ശാസ്ത്ര-പുരാവസ്തു-ജൈവഭക്ഷണ-ഔഷധസസ്യ-വിദ്യാഭ്യസ പ്രദര്‍ശനം സമ്മേളന ഹാളിനു പുറകില്‍ പ്രത്യേകം ഒരുക്കിയ ഭാഗത്ത് നടന്നു. 

    കുട്ടികള്‍ നിര്‍മ്മിച്ച എല്‍.ഇ.ഡി. ബള്‍ബുകളും, സോപ്പ്, സോപ്പുപൊടി, ലോഷനുകള്‍ തുടങ്ങിയവയും പ്രദര്‍ശനത്തിനുണ്ടായിരുന്നു. ഉച്ചകഴിഞ്ഞ്, എട്ടാം ക്ലാസ് വരെയുള്ള കുട്ടികളുടെ നൃത്തവും പാട്ടുകളും മറ്റ് കലാപരിപാടികളും അരങ്ങേറി. കരാട്ടേ പരിശീലനം നേടിയ കുട്ടികളുടെ പ്രത്യേക അവതരണവും പരിപാടിയുടെ ഭാഗമായി നടന്നു. നൂറില്‍പരം രക്ഷിതാക്കളും കുട്ടികള്‍ക്ക് പ്രോത്സാഹനവുമായി സ്കൂളില്‍ എത്തിയിരുന്നു. മുന്‍കൂട്ടി പേര് നല്‍കി ഒരുങ്ങാത്തവര്‍ക്കും അതിഥികളായി എത്തിയവര്‍ക്കും കലാപരിപാടികള്‍ അവതരിപ്പിക്കുവാന്‍ നല്‍കിയ അവസരവും ശ്രദ്ധേയമായി. സ്കൂളില്‍ എത്തിയ എല്ലാവര്‍ക്കും സമൃദ്ധമായ ഉച്ചഭക്ഷണവും ഒരുക്കിയിരുന്നു.
      രാവിലെ, സ്കൂളിലെ ചാവറ ഹാളില്‍ നടന്ന സമ്മേളനത്തില്‍ പൂഞ്ഞാര്‍ തെക്കേക്കര ഗ്രാമപഞ്ചായത്ത് പ്രസിഡന്റ് ശ്രീമതി ഷൈനി സന്തോഷ് പഠനോത്സവം ഉദ്ഘാടനം ചെയ്തു. സ്കൂള്‍ മാനേജര്‍ റവ. ഫാ. ജെയിംസ് നീണ്ടൂശ്ശേരി CMI അദ്ധ്യക്ഷത വഹിച്ച യോഗത്തില്‍ ഹെഡ്മാസ്റ്റര്‍ ശ്രീ. ജോസ് ജോര്‍ജ്ജ്, പി.റ്റി.എ. പ്രസിഡന്റ് ശ്രീ. ഡെന്നി പുല്ലാട്ട്, സ്റ്റാഫ് സെക്രട്ടറി ശ്രീ. ജോബിന്‍ കുരുവിള തുടങ്ങിയവര്‍ ആശംസകളര്‍പ്പിച്ച് സംസാരിച്ചു. 
 
നേരില്‍ കാണേണ്ട പരിപാടികള്‍ ചിത്രങ്ങളിലൂടെ വിവരിക്കുക അസാധ്യമെങ്കിലും, ലഭിച്ച ചില ഫോട്ടോകള്‍ ചുവടെ നല്‍കുന്നു. പ്രധാന ദൃശ്യങ്ങളടങ്ങിയ വീഡിയോ പിന്നീട് നല്‍കുന്നതാണ്.

Thursday, January 24, 2019

പൂഞ്ഞാര്‍ സെന്റ് ആന്റണീസില്‍ വാര്‍ഷികാഘോഷവും യാത്രയയപ്പ് സമ്മേളനവും..

പൂഞ്ഞാര്‍ സെന്റ് ആന്റണീസ് ഹയര്‍ സെക്കന്‍ഡറി സ്കൂള്‍ വാര്‍ഷികാഘോഷം പി.സി. ജോര്‍ജ്ജ് എം.എല്‍.എ. ഉദ്ഘാടനം ചെയ്യുന്നു. ടോണി തോമസ്, ജോബിന്‍ കുരുവിള, ഫാ. മാത്യു ജോര്‍ജ്ജ്, ഡെന്നി പുല്ലാട്ട്,  ജോസ് ജോര്‍ജ്ജ്,  തോമസ് മാത്യു പി., എ.ജെ. ജോസഫ്, ഫാ. സാബു കൂടപ്പാട്ട് സി.എം.ഐ.,  കെ. രാജേഷ്, മഹേശ്വര്‍ സുദര്‍ശനന്‍, ഷൈനി സന്തോഷ്, മേരിക്കുട്ടി സെബാസ്റ്റ്യന്‍,  ഫാ. ജെയിംസ് നീണ്ടൂശ്ശേരി സി.എം.ഐ., നിര്‍മ്മല മോഹനന്‍,     ഡെയ്സമ്മ ജോസഫ്, നെല്‍ബി തോമസ് തുടങ്ങിയവര്‍ സമീപം.
      പൂഞ്ഞാര്‍ : സെന്റ് ആന്റണീസ് ഹയര്‍ സെക്കന്‍ഡറി സ്കൂളിന്റെ വാര്‍ഷികാഘോഷം പി.സി. ജോര്‍ജ്ജ് എം.എല്‍.എ. ഉദ്ഘാടനം ചെയ്തു. കോര്‍പ്പറേറ്റ് മാനേജര്‍ ഫാ. സാബു കൂടപ്പാട്ട് സി.എം.ഐ. അധ്യക്ഷത വഹിച്ച യോഗത്തില്‍ സ്കൂള്‍ മാനേജര്‍ ഫാ. ജെയിംസ് നീണ്ടൂശ്ശേരി സി.എം.ഐ. അനുഗ്രഹ പ്രഭാഷണം നടത്തി. അഭിജിത്ത് എ.ബി. മെമ്മോറിയല്‍ എന്‍ഡോവ്മെന്റ് സമര്‍പ്പണം ജില്ലാ പഞ്ചായത്ത് മെമ്പര്‍ കെ. രാജേഷ് നിര്‍വ്വഹിച്ചു.

 
      സര്‍വ്വീസില്‍നിന്ന് വിരമിക്കുന്ന അധ്യാപകരായ തോമസ് മാത്യു പി., മേരിക്കുട്ടി സെബാസ്റ്റ്യന്‍ എന്നിവര്‍ക്കുള്ള ഉപഹാരങ്ങളും യോഗത്തില്‍ സമര്‍പ്പിച്ചു. പ്രിന്‍സിപ്പല്‍ എ.ജെ. ജോസഫ് സ്വാഗതം ആശംസിച്ച സമ്മേളനത്തില്‍ ഹെഡ്മാസ്റ്റര്‍ ജോസ് ജോര്‍ജ്ജ് റിപ്പോര്‍ട്ട് അവതരിപ്പിച്ചു.
      പൂഞ്ഞാര്‍ തെക്കേക്കര ഗ്രാമ പഞ്ചായത്ത് പ്രസിഡന്റ് ഷൈനി സന്തോഷ്, വാര്‍ഡ് മെമ്പര്‍ നിര്‍മ്മല മോഹനന്‍, പി.റ്റി.എ. പ്രസിഡന്റ്  ഡെന്നി പുല്ലാട്ട്, സ്റ്റാഫ് പ്രതിനിധികളായ ഫാ. മാത്യു ജോര്‍ജ്ജ്, ടോണി തോമസ്, ഡെയ്സമ്മ ജോസഫ്, സ്റ്റാഫ് സെക്രട്ടറി  ജോബിന്‍ കുരുവിള, സ്കൂള്‍ ലീഡേഴ്സായ മഹേശ്വര്‍ സുദര്‍ശനന്‍, നെല്‍ബി തോമസ് എന്നിവര്‍ പ്രസംഗിച്ചു.
 
      സംസ്ഥാനതലത്തില്‍ വിവിധ മേളകളില്‍ സമ്മാനാര്‍ഹരായവര്‍ക്കും ഉപജില്ലാ-ജില്ലാ തലങ്ങളില്‍ ആദ്യ സ്ഥാനങ്ങള്‍ നേടിയവര്‍ക്കും പഠനത്തില്‍ മികവുപുലര്‍ത്തിയവര്‍ക്കും പ്രത്യേക പുരസ്ക്കാരങ്ങളും വിതരണം ചെയ്തു.  ഉച്ചകഴിഞ്ഞ് കുട്ടികളുടെ വിവിധ കലാപരിപാടികളും ഉപകരണസംഗീത അരങ്ങേറ്റവും നടന്നു.
സമ്മേളനത്തിന്റെയും കലാപരിപാടികളുടെയും കൂടുതല്‍ ചിത്രങ്ങള്‍ ചുവടെ..

Tuesday, January 15, 2019

ദേവസ്യാ സാറിന്റെ സ്മരണയില്‍ പൂഞ്ഞാര്‍ സെന്റ് ആന്റണീസ് കുടുംബം..




പൂഞ്ഞാര്‍ : സെന്റ് ആന്റണീസ് ഹയർ സെക്കന്ററി സ്കൂളിലെ സോഷ്യല്‍വര്‍ക്ക് വിഭാഗം അധ്യാപകനായിരുന്ന ദേവസ്യാ ജോസഫ് സാറിന്റെ സ്മരണയ്ക്കായി അഖിലകേരള പ്രസംഗമത്സരവും അനുസ്മരണ സമ്മേളനവും നടന്നു. സ്കൂളിലെ ചാവറ ഹാളില്‍നടന്ന സമ്മേളനം, പ്രശസ്ത കവിയും ഗാനരചയിതാവും വിക്ടേഴ്സ് ചാനല്‍ ഡയറക്ടറുമായ ശ്രീ. മുരുകന്‍ കാട്ടാക്കട ഉദ്ഘാടനം ചെയ്തു. സ്കൂള്‍ മാനേജര്‍ ഫാ. ജെയിംസ് നീണ്ടൂശ്ശേരി സി.എം.. അദ്ധ്യക്ഷത വഹിച്ചു. ദേവസ്യാ സാറിന്റെ സ്മരണാര്‍ത്ഥം ഏര്‍പ്പെടുത്തുന്ന എന്‍ഡോവ്മെന്റിന്റെ സമര്‍പ്പണം പൂഞ്ഞാര്‍ തെക്കേക്കര ഗ്രാമപഞ്ചായത്ത് പ്രസിഡന്റ് ശ്രീമതി. ഷൈനി സന്തോഷ് നിര്‍വ്വഹിച്ചു. വാര്‍ഡ് മെമ്പര്‍ ശ്രീമതി. നിര്‍മ്മല മോഹനന്‍ ഫോട്ടോ അനാച്ഛാദനം ചെയ്തു. ദേവസ്യാ സാറിന്റെ സ്മരണാര്‍ത്ഥം ഹൈസ്കൂള്‍ ക്ലാസുകളില്‍ ആരംഭിക്കുന്ന ക്ലാസ് ലൈബ്രറിയുടെ ഉദ്ഘാടനം ശ്രീ. മുരുകന്‍ കാട്ടാക്കട നിര്‍വ്വഹിച്ചു. 
പ്രിന്‍സിപ്പല്‍ ശ്രീ. .ജെ. ജോസഫ്, ഹെഡ്മാസ്റ്റര്‍ ശ്രീ. ജോസ് ജോര്‍ജ്ജ്, പ്രോഗ്രാം കോ-ഓര്‍ഡിനേറ്റര്‍മാരായ അഡ്വ. സോണി തോമസ്, ശ്രീ. ടോം തോമസ് വെട്ടിക്കൊമ്പില്‍, മുണ്ടക്കയം മണ്ഡലം സെക്രട്ടറി അഡ്വ. എന്‍.ജെ. കുര്യാക്കോസ്, ദേവസ്യാ സാറിന്റെ മകള്‍ കുമാരി ഡിയോണവ് ഡി., എം.പി.റ്റി.. പ്രസിഡന്റ് ശ്രീമതി. ആഷാ ജോസ്, പെരിങ്ങാശ്ശേരി ഗവ. ഹയര്‍ സെക്കന്‍ഡറി സ്കൂള്‍ സോഷ്യല്‍വര്‍ക്ക് അധ്യാപകന്‍ ശ്രീ. ഷൈനോജ്, മുന്‍ അധ്യാപക പ്രതിനിധി ശ്രീമതി. എം.സി. ഏലിക്കുട്ടി, ഹയര്‍ സെക്കന്‍ഡറി അധ്യാപക പ്രതിനിധി ശ്രീമതി. ഷൈനി ജോസഫ്, സ്റ്റാഫ് സെക്രട്ടറി ശ്രീ. ജോബിന്‍ കുരുവിള, ഹൈസ്കൂള്‍ അധ്യാപക പ്രതിനിധി ശ്രീ. ടോണി തോമസ്, പൂര്‍വ്വ വിദ്യാര്‍ത്ഥി പ്രതിനിധി കുമാരി ആല്‍ബിറ്റ കുര്യന്‍, വിദ്യാര്‍ത്ഥി പ്രതിനിധി കുമാരി ബിന്ദുജ വി.എസ്. എന്നിവര്‍ പ്രസംഗിച്ചു. ഉച്ചകഴിഞ്ഞ് ഹയര്‍ സെക്കന്‍ഡറി സ്കൂള്‍ വിദ്യാര്‍ത്ഥികള്‍ക്കായുള്ള പ്രസംഗമത്സരവും നടന്നു.

കൂടുതല്‍ ചിത്രങ്ങള്‍ ചുവടെ നല്‍കുന്നു..

Friday, January 11, 2019

ദേവസ്യാ ജോസഫ് അനുസ്മരണവും പ്രസംഗ മത്സരവും ജനുവരി പതിനാലിന്..

    ദേവസ്യാ ജോസഫ് അനുസ്മരണവും അഖിലകേരള പ്രസംഗമത്സരവും ജനുവരി പതിനാല്, തിങ്കളാഴ്ച്ച, രാവിലെ പത്തുമുതല്‍ നടക്കും. പ്രശസ്ത കവിയും ഗാനരചയിതാവുമായ ശ്രീ. മുരുകന്‍ കാട്ടാക്കടയുടെ വിശിഷ്ട സാന്നിദ്ധ്യവുമുണ്ടാകും.
        സെന്റ് ആന്റണീസ് ഹയർ സെക്കന്ററി സ്കൂളിലെ സോഷ്യല്‍വര്‍ക്ക് വിഭാഗം അധ്യാപകനായിരുന്ന ദേവസ്യാ ജോസഫ് സാറിന്റെ അകാല വേർപാട് ശിഷ്യ - സുഹൃദ് ഗണങ്ങൾക്ക് ഇന്നും ഉള്‍ക്കൊള്ളാനായിട്ടില്ല. ശിഷ്യഹൃദയങ്ങളിൽ തന്റേതായ സിംഹാസനം സ്ഥാപിച്ച ഈ അധ്യാപക ശ്രേഷ്ഠന്റെ ഓരോ ക്ലാസുകളും ഏറെ ഹൃദ്യവും അനുഭവ വേദ്യവുമായിരുന്നു. അതിർവരമ്പുകളില്ലാത്ത സൗഹൃദത്തിന്റെ നിലാവ് പരത്തുവാൻ കഴിവുള്ള ദേവസ്യാ സാർ, പരിചയപ്പെട്ടവർക്കൊക്കെ സുഹൃത്തും വഴികാട്ടിയുമായിരുന്നു. ആ ആത്മബന്ധത്തിന്റെ ആഴമറിഞ്ഞവർക്ക് അതെന്നും പച്ചകെടാത്ത ഒരോർമ്മയാണ്.
          കാഞ്ഞിരപ്പള്ളി AKJM സ്കൂളിൽനിന്ന് SSLC പഠിച്ചിറങ്ങിയ, രാജു എന്ന വിളിപ്പേരിൽ അറിയപ്പെട്ടിരുന്ന, കാഞ്ഞിരപ്പള്ളിയുടെ ഈ കർഷക പുത്രൻ , എൺപതുകളിൽ മാന്നാനം കെ.ഇ. കോളേജിന്റെ ചെയർമാനായി, കലാലയ ആഘോഷങ്ങൾക്ക് നിറം പകർന്ന്, ക്യാമ്പസിന്റെ മർമ്മരവും ഉത്സവവുമായിരുന്നു. ഞൊണ്ടിയാമാക്കൽ രാജു സാറിനെ അറിയാത്തവർ കാത്തിരപ്പള്ളി മേഖലയിൽ വിരളമായിരിക്കും.
  സുവർണ്ണ നാവിനാൽ അനുഗ്രഹീതനായ പ്രസംഗകൻ, നാടകകൃത്ത്, സംവിധായകൻ, അഭിനേതാവ്, എഴുത്തുകാരൻ, കഥകളെയും കവിതകളെയും പ്രണയിച്ച ആർദ്രഭാവത്തിന്റെ ഉടമ തുടങ്ങിയ നിലകളിൽ അസാധാരണ വ്യക്തിത്വത്തിന്റെ ഉടമയായിരുന്നു ദേവസ്യാ സാർ.
     രണ്ടായിരാമാണ്ടിൽ പൂഞ്ഞാർ സെൻറ് ആന്റണീസിൽ ഹയർ സെക്കന്ററി ആരംഭിച്ചതുമുതൽ ഹ്യുമാനിറ്റീസ് വിഭാഗം സോഷ്യൽവർക്ക് അധ്യാപകനായി , തന്റെ കർമ്മ മണ്ഡലം പൂഞ്ഞാറിലേക്കും അദ്ദേഹം വ്യാപിപ്പിച്ചു. അറിയപ്പെടുന്ന വാഗ്മി, ഗ്രന്ഥകർത്താവ്, കവി, SCERT - യു ടെ സംസ്ഥാന റിസോഴ്സ് പേഴ്സൺ, കൗൺസിലർ, കരിയർ ഗൈഡ് തുടങ്ങിയ മേഖലകളിലും അദ്ദേഹം തന്റെ കഴിവു തെളിയിച്ചു.
     സാമൂഹിക - രാഷ്ട്രീയ - സാംസ്ക്കാരിക - വിദ്യാഭ്യാസ രംഗങ്ങളിൽ വ്യക്തിമുദ്ര പതിപ്പിച്ച പ്രതിഭാധനനായിരുന്നു ദേവസ്യാ ജോസഫ് സാർ. പൂഞ്ഞാർ സെന്റ് ആന്റണീസ് ഹയർ സെക്കന്ററി സ്കൂളിലെ കുട്ടികളെയും അധ്യാപകരെയും മാതാപിതാക്കളെയും നാടിനെത്തന്നെയും ദുഖത്തിലാഴ്ത്തിക്കൊണ്ട്, ഒരായിരം ഓർമ്മകൾ അവശേഷിപ്പിച്ച് അദ്ദേഹം കടന്നു പോയി.. എന്നെന്നേക്കുമായി... 

അദ്ദേഹത്തിന്റെ അനുസ്മരണ പരിപാടികളുടെ വിശദവിവരങ്ങള്‍ ചുവടെ ചേര്‍ക്കുന്നു..




Monday, November 5, 2018

മലയാളത്തനിമയുടെ നിറപ്പകിട്ടാര്‍ന്ന കേരളപ്പിറവി ആഘോഷം പൂഞ്ഞാര്‍ സെന്റ് ആന്റണീസില്‍..


      മലയാളത്തനിമ നിറഞ്ഞതും നിറപ്പകിട്ടാര്‍ന്നതുമായ കേരളപ്പിറവി ആഘോഷമാണ് നവംബര്‍ ഒന്നിന് പൂഞ്ഞാര്‍ സെന്റ് ആന്റണീസ് ഹയര്‍ സെക്കന്‍ഡറി സ്കൂളില്‍ നടന്നത്. 'നവകേരളം എന്റെ ഭാവനയില്‍ ' എന്ന വിഷയത്തില്‍ കുട്ടികള്‍ക്കായി ഉപന്യാസ-കഥാ-കവിതാ-ചിത്രരചനാ മത്സരങ്ങള്‍ നടത്തി. 
      സ്കൂളിലെ എല്ലാ കുട്ടികളും ഈ മത്സരത്തില്‍ പങ്കെടുത്ത് നവകേരളത്തെക്കുറിച്ചുള്ള അവരുടെ സ്വപ്നങ്ങള്‍ പങ്കുവച്ചു. നവംബര്‍ ഒന്നിന് രാവിലെ, സ്കൂളിലെ ചാവറ ഹാളില്‍ ആരംഭിച്ച പോസ്റ്റര്‍ പ്രദര്‍ശനത്തോടെ മലയാളദിനാചരണത്തിന് തുടക്കമായി. മലയാളത്തിലെ പ്രശസ്തരായ എഴുത്തുകാരെയും കവികളെയും പരിചയപ്പെടുത്തുന്ന നൂറോളം പോസ്റ്ററുകള്‍ പ്രദര്‍ശനത്തിലുണ്ടായിരുന്നു.
      ഉച്ചകഴിഞ്ഞുനടന്ന പൊതുസമ്മേളനം ഹെഡ്മാസ്റ്റര്‍ ശ്രീ. ജോസ് ജോര്‍ജ്ജ് ഉദ്ഘാടനം ചെ്തു. യു.പി. കുട്ടികള്‍ അവതരിപ്പിച്ച രംഗപൂജയോടെ ആരംഭിച്ച സമ്മേളനത്തിലെ പ്രധാന ആകര്‍ഷണം, മലയാളി മങ്ക - മലയാളി ശ്രീമാന്‍ മത്സരമായിരുന്നു. മൂന്നു റൗണ്ടുകളായി നടന്ന മത്സരത്തില്‍ നാല്‍പ്പത് കുട്ടികള്‍ പങ്കെടുത്തു. രണ്ടാം റൗണ്ടിലെ, പൊതുവിജ്ഞാന പരിശോധനാ ചോദ്യങ്ങളെ അതിജീവിച്ച് ഒന്‍പത് കുട്ടികളാണ് ഫൈനലില്‍ എത്തിയത്. 'കേരളത്തിന്റെ മുഖ്യമന്ത്രി ആയാല്‍ നവകേരള സൃഷ്ടിക്കായി എന്തുചെയ്യും?' എന്ന ചോദ്യത്തിനായിരുന്നു അവര്‍ അവസാന റൗണ്ടില്‍ ഉത്തരം പറയേണ്ടിയിരുന്നത്. പത്താം ക്ലാസ് വിദ്യാര്‍ഥികളായ മരിയ ജോസഫ്, മാര്‍ട്ടിന്‍ ബെന്നി എന്നിവര്‍ മലയാളി മങ്കയായും  ശ്രീമാനായും തെരഞ്ഞെടുക്കപ്പെട്ടു. 

      എട്ട്, ഒന്‍പത് ക്ലാസുകളിലെ എല്ലാ ഡിവിഷനുകളില്‍നിന്നും പത്തുപേരടങ്ങിയ ടീമുകള്‍ കവിതകള്‍ അവതരിപ്പിച്ചു. സ്കൂള്‍ ഗായക സംഘം അവതരിപ്പിച്ച കേരള ഗാനം ശ്രദ്ധേയമായി. മലയാളദിന പ്രതിജ്ഞ, ലളിതഗാനം, പ്രഭാഷണം, വീഡിയോ പ്രദര്‍ശനം എന്നിവ പരിപാടിയുടെ ഭാഗമായി നടന്നു.



      സ്കൂള്‍ പ്രിന്‍സിപ്പല്‍ ശ്രീ. എ.ജെ. ജോസഫ് സമാപന സന്ദേശം നല്‍കുകയും വിജയികള്‍ക്കുള്ള സമ്മാനവിതരണം നിര്‍വ്വഹിക്കുകയും ചെയ്തു. സ്കൂളിലെ മുന്‍ സംഗീത അധ്യാപിക ശ്രീമതി. ആലീസ് ജേക്കബ് മുഖ്യ ജഡ്ജ് ആയിരുന്നു. രചന മത്സരങ്ങളില്‍ ആദ്യ സ്ഥാനങ്ങള്‍ കരസ്ഥമാക്കിയ കുട്ടികളുടെ കൃതികള്‍ ഉള്‍പ്പെടുത്തി നിര്‍മ്മിച്ച കൈയെഴുത്തു മാസിക സമ്മേളനത്തില്‍ പ്രകാശനം ചെയ്തു. പി.റ്റി.എ. പ്രസിഡന്റ് ശ്രീ. ഡെന്നി പുല്ലാട്ട് ആശംസയും സ്റ്റാഫ് സെക്രട്ടറി ശ്രീ. ജോബിന്‍ കുരുവിള നന്ദിയും പറഞ്ഞു. മധുര പലഹാര വിതരണത്തോടെയാണ് ആഘോഷ പരിപാടികള്‍ അവസാനിച്ചത്.
പരിപാടിയുടെ പ്രസക്തഭാഗങ്ങള്‍ അടങ്ങിയ 5 മിനിട്ട് വീഡിയോ ചുവടെ..

കൂടുതല്‍ ചിത്രങ്ങള്‍ ചുവടെ നല്‍കുന്നു..

Tuesday, October 30, 2018

ഈരാറ്റുപേട്ട ഉപജില്ലാ കലോത്സവം 2018

ഈരാറ്റുപേട്ട MG HSS-ല്‍ നടന്ന ഉപജില്ലാ കലോത്സവത്തിന്റെ റിസല്‍ട്ടിനായി 

Saturday, October 20, 2018

പുണ്യപിതാക്കന്മാരുടെ അനുസ്മരണാഘോഷം പൂഞ്ഞാറില്‍ നടന്നു..

സീറോ മലബാര്‍ സഭാപിതാക്കന്‍മാരായ ഫാ. ജോണ്‍ ബോസ്ക്കോ തോട്ടക്കര സി.എം.ഐ.,  ഫാ. എമ്മാനുവെല്‍ തെള്ളി സി.എം.ഐ. എന്നിവരുടെ കബറിടങ്ങളിലേക്കുള്ള തീര്‍ത്ഥാടനം, വടവാതൂര്‍ പൗരസ്ത്യ വിദ്യാപീഠം പ്രസിഡന്റ് റവ. ഡോ. ആന്‍ഡ്രൂസ് മേക്കാട്ടുകുന്നേല്‍ ഫ്ലാഗ് ഓഫ് ചെയ്യുന്നു. ഫാ. അഗസ്റ്റിന്‍ തെരുവത്ത്, റിജോ സ്രാമ്പിക്കല്‍, ഫാ. ജെയിസ് നീണ്ടൂശ്ശേരി സി.എം.ഐ., എ.ജെ. ജോസഫ്,  ആല്‍വിന്‍ മണിയങ്ങാട്ട്, അമല്‍ പുല്ലുതുരുത്തിയില്‍, ഫെബിന്‍ മൂക്കംതടത്തില്‍ തുടങ്ങിയവർ സമീപം.

പൂഞ്ഞാര്‍ : സീറോ മലബാര്‍ സഭയുടെ അഖിലേന്ത്യാ അജപാലന അധികാരം പുനസ്ഥാപിക്കുന്നതിനായി പ്രയത്നിച്ച റവ. ഫാ. ജോണ്‍ ബോസ്ക്കോ തോട്ടക്കര സി.എം.ഐ., സുറിയാനി പണ്ഡിതനായ റവ. ഫാ. എമ്മാനുവെല്‍ തെള്ളി സി.എം.ഐ. എന്നിവരുടെ കബറിടത്തിലേക്കുള്ള തീര്‍ത്ഥാടനവും അനുസ്മരണാഘോഷവും പൂഞ്ഞാറില്‍ നടന്നു.  പൂഞ്ഞാര്‍ ഫൊറോന പള്ളിയില്‍, വികാരി ഫാ. അഗസ്റ്റിന്‍ തെരുവത്തിന്റെ നേതൃത്വത്തില്‍ നടന്ന പ്രാര്‍ഥനാ ശുശ്രൂഷകള്‍ക്കുശേഷം ഈ പിതാക്കന്‍മാരുടെ  കബറിടം സ്ഥിതിചെയ്യുന്ന പൂഞ്ഞാര്‍ സി.എം.ഐ. ചെറുപുഷ്പാശ്രമ ദൈവാലയത്തിലേക്ക് തീര്‍ത്ഥാടന പദയാത്ര നടന്നു. 
സീറോ മലബാര്‍ യൂത്ത് നേതൃത്വം നല്‍കിയ ഈ തീര്‍ഥാടനം, വടവാതൂര്‍ പൗരസ്ത്യ വിദ്യാപീഠം പ്രസിഡന്റ് റവ. ഡോ. ആന്‍ഡ്രൂസ് മേക്കാട്ടുകുന്നേല്‍ ഫ്ലാഗ് ഓഫ് ചെയ്തു.
    ചെറുപുഷ്പാശ്രമ ദൈവാലയത്തില്‍ നടന്ന അനുസ്മരണാഘോഷത്തില്‍, പാലാ രൂപതാധ്യക്ഷന്‍ മാര്‍ ജോസഫ് കല്ലറങ്ങാട്ട് അനുസ്മരണ സന്ദേശം നല്‍കുകയും സുറിയാനി പാട്ടുകുര്‍ബാനയ്ക്ക്  മുഖ്യകാര്‍മ്മികത്വം വഹിക്കുകയും ചെയ്തു. 
വി. ചാവറപിതാവ്  സ്ഥാപിച്ച സി.എം.ഐ. സഭയുടെ ആരംഭകാലംമുതല്‍ സി.എം.ഐ. സഭാംഗങ്ങളായ ഏഴു വ്യാകുലങ്ങള്‍, ഫാ. പ്ലാസിഡ് ജെ. പൊടിപ്പാറ സി.എം.ഐ., ഫാ. ജോണ്‍ ബോസ്കോ സി.എം.ഐ., ഫാ. എമ്മാനുവെല്‍ തെള്ളി സി.എം.ഐ. എന്നിവര്‍ ഭാരത മാര്‍തോമാ നസ്രാണിസഭയുടെ അജപാലനാധികാര പുനസ്ഥാപനത്തിനായി നല്‍കിയ ത്യാഗപൂര്‍ണ്ണമായ സേവനങ്ങളെ അഭിവന്ദ്യ പിതാവ് ഉള്‍പ്പെടെയുള്ളവര്‍ പ്രത്യേകം സ്മരിച്ചു. വിശുദ്ധ കുര്‍ബാനക്കുശേഷം, ഫാ. അലക്സാണ്ടര്‍ പൈകട സി.എം.ഐ. രചിച്ച 'ചരിത്രം സൃഷ്ടിച്ച സഭാസ്നേഹികള്‍ ' എന്ന ഗ്രന്ഥം, മാര്‍ ജോസഫ് കല്ലറങ്ങാട്ട് വടവാതൂര്‍ പൗരസ്ത്യ വിദ്യാപീഠം പ്രസിഡന്റ് റവ. ഡോ. ആന്‍ഡ്രൂസ് മേക്കാട്ടിന് നല്‍കി പ്രകാശനം ചെയ്തു.
     തുടര്‍ന്ന്, പൂഞ്ഞാര്‍ സെന്റ് ആന്റണീസ് ഹയര്‍ സെക്കന്‍ഡറി സ്കൂളിലെ ചാവറ ഹാളില്‍ നടന്ന അനുസ്മരണ സമ്മേളനത്തില്‍ ദീപിക ചീഫ് എഡിറ്റര്‍ ഫാ. ബോബി മണ്ണംപ്ലാക്കല്‍, പ്രൊവിന്‍ഷ്യല്‍ കൗണ്‍സിലര്‍ ഫാ. ബോബി വടയാറ്റുകുന്നേല്‍ സി.എം.ഐ., കോട്ടയം സീറി ഡയറക്ടര്‍ ഫാ. ജേക്കബ് തെക്കേപ്പറമ്പില്‍ , മുന്‍ വികാരി ജനറാള്‍ ഫാ. ഫിലിപ്പ് ഞരളക്കാട്ട്, വടവാതൂര്‍ പൗരസ്ത്യ വിദ്യാപീഠം മുന്‍ ഡീന്‍ ഫാ. തോമസ് മണ്ണൂരാംപറമ്പില്‍, ദീപിക മുന്‍ ചീഫ് എഡിറ്റര്‍ ഫാ. അലക്സാണ്ടര്‍ പൈകട സി.എം.ഐ.,   ചെറുപുഷ്പാശ്രമ പ്രിയോര്‍ ഫാ. ജെയിസ് നീണ്ടൂശ്ശേരി സി.എം.ഐ., ഫാ. കുര്യാക്കോസ് ഏലിയാ വടക്കേത്ത് സി.എം.ഐ.,  തോമാ മത്തായി തളികസ്ഥാനം,  സ്കൂൾ പ്രിന്‍സിപ്പല്‍ എ.ജെ. ജോസഫ്  എന്നിവര്‍ പ്രസംഗിച്ചു. 
 ഫാ. ജോബി മംഗലത്തുകരോട്ട് സി.എം.ഐ., ഫാ. ഫ്രാന്‍സിസ് ഇടത്തിനാല്‍,  സ്കൂൾ ഹെഡ്മാസ്റ്റർ ജോസ് ജോർജ്,  ജനറല്‍ കണ്‍വീനര്‍ ജോബി പടന്നമാക്കല്‍, ആല്‍വിന്‍ മണിയങ്ങാട്ട്, അമല്‍ പുല്ലുതുരുത്തിയില്‍, ഫെബിന്‍ മൂക്കംതടത്തില്‍ , റിജോ സ്രാമ്പിക്കല്‍ തുടങ്ങിയവര്‍ പരിപാടികള്‍ക്ക് നേതൃത്വം നല്‍കി. നേർച്ച ഭക്ഷണത്തോടെയാണ് അനുസ്മരണാഘോഷം സമാപിച്ചത്.

കൂടുതല്‍ ചിത്രങ്ങള്‍ ചുവടെ നല്‍കുന്നു..

Monday, May 7, 2018

ദേവസ്യാ സാറിന്റെ വിയോഗം - നാടിനു നഷ്ടമായത് ബഹുമുഖപ്രതിഭയായ ഗുരുശ്രേഷ്ഠനെ..

പൂഞ്ഞാർ: സെന്റ് ആന്റണീസ് ഹയർ സെക്കന്ററി സ്കൂൾ അധ്യാപകനായ ദേവസ്യാ ജോസഫ് സാറിന്റെ അകാല വേർപാട് ശിഷ്യ - സുഹൃദ് ഗണങ്ങൾക്കും നാടിനും തീരാ നഷ്ടമായി. ശിഷ്യഹൃദയങ്ങളിൽ തന്റേതായ സിംഹാസനം സ്ഥാപിച്ച ഈ അധ്യാപക ശ്രേഷ്ഠന്റെ ഓരോ ക്ലാസുകളും ഏറെ ഹൃദ്യവും അനുഭവ വേദ്യവുമായിരുന്നു. അതിർവരമ്പുകളില്ലാത്ത സൗഹൃദത്തിന്റെ നിലാവ് പരത്തുവാൻ കഴിവുള്ള ദേവസ്യാ സാർ, പരിചയപ്പെട്ടവർക്കൊക്കെ സുഹൃത്തും വഴികാട്ടിയുമായിരുന്നു. ആ ആത്മബന്ധത്തിന്റെ ആഴമറിഞ്ഞവർക്ക് അതെന്നും പച്ചകെടാത്ത ഒരോർമ്മയാണ്.

കാഞ്ഞിരപ്പള്ളി AKJM സ്കൂളിൽനിന്ന് SSLC പഠിച്ചിറങ്ങിയ, രാജു എന്ന വിളിപ്പേരിൽ അറിയപ്പെട്ടിരുന്ന, കാഞ്ഞിരപ്പള്ളിയുടെ ഈ കർഷക പുത്രൻ , എൺപതുകളിൽ മാന്നാനം കെ.ഇ. കോളേജിന്റെ ചെയർമാനായി, കലാലയ ആഘോഷങ്ങൾക്ക് നിറം പകർന്ന്, ക്യാമ്പസിന്റെ മർമ്മരവും ഉത്സവവുമായിരുന്നു. ഞൊണ്ടിയാമാക്കൽ രാജു സാറിനെ അറിയാത്തവർ ഇന്ന് കാത്തിരപ്പള്ളി മേഖലയിൽ വിരളമായിരിക്കും.


സുവർണ്ണ നാവിനാൽ അനുഗ്രഹീതനായ പ്രസംഗകൻ, നാടകകൃത്ത്, സംവിധായകൻ, അഭിനേതാവ്, എഴുത്തുകാരൻ, കഥകളെയും കവിതകളെയും പ്രണയിച്ച ആർദ്രഭാവത്തിന്റെ ഉടമ തുടങ്ങിയ നിലകളിൽ അസാധാരണ വ്യക്തിത്വത്തിന്റെ ഉടമയായിരുന്നു ദേവസ്യാ സാർ.

രണ്ടായിരാമാണ്ടിൽ പൂഞ്ഞാർ സെൻറ് ആന്റണീസിൽ ഹയർ സെക്കന്ററി ആരംഭിച്ചതുമുതൽ ഹ്യുമാനിറ്റീസ് വിഭാഗം സോഷ്യൽവർക്ക് അധ്യാപകനായി , തന്റെ കർമ്മ മണ്ഡലം പൂഞ്ഞാറിലേക്കും അദ്ദേഹം വ്യാപിപ്പിച്ചു. അറിയപ്പെടുന്ന വാഗ്മി, ഗ്രന്ഥകർത്താവ്, കവി, SCERT - യു ടെ സംസ്ഥാന റിസോഴ്സ് പേഴ്സൺ, കൗൺസിലർ, കരിയർ ഗൈഡ് തുടങ്ങിയ മേഖലകളിലും അദ്ദേഹം തന്റെ കഴിവു തെളിയിച്ചു.

സാമൂഹിക - രാഷ്ട്രീയ - സാംസ്ക്കാരിക - വിദ്യാഭ്യാസ രംഗങ്ങളിൽ വ്യക്തിമുദ്ര പതിപ്പിച്ച പ്രതിഭാധനനായിരുന്നു ദേവസ്യാ ജോസഫ് സാർ. പൂഞ്ഞാർ സെന്റ് ആന്റണീസ് ഹയർ സെക്കന്ററി സ്കൂളിലെ കുട്ടികളെയും അധ്യാപകരെയും മാതാപിതാക്കളെയും നാടിനെത്തന്നെയും ദുഖത്തിലാഴ്ത്തിക്കൊണ്ട്, ഒരായിരം ഓർമ്മകൾ അവശേഷിപ്പിച്ച് അദ്ദേഹം കടന്നു പോയി.. എന്നെന്നേക്കുമായി...
 

Tuesday, February 20, 2018

"പ്രാര്‍ഥിക്കുന്നവന്‍ മനുഷ്യനാണ് , പ്രവര്‍ത്തിക്കുന്നവന്‍ ദൈവവും" - 'കുഞ്ഞു ദൈവം'


         കുഞ്ഞു ദൈവം കണ്ടു.. പ്രതീക്ഷകൾക്കപ്പുറം ഹൃദയത്തെ സ്പർശിച്ചു ഈ കൊച്ചു സിനിമ. ലാളിത്യമുളള.. നന്മകൾ നിറഞ്ഞ.. പോസിറ്റീവ് എനർജി പകരുന്ന ഒരു സുന്ദര ചിത്രം .. 
     മികച്ച തുടക്കം. ഹ്രസ്വമായ ആദ്യ പകുതി. ഇടവേളക്ക് ശേഷം ചിത്രം ഒന്നുകൂടി ഗംഭീരമായി. ഔസേപ്പച്ചന്റെ നിഷ്കളങ്കമായ പ്രാർഥനകളിലൂടെയാണ് കഥ വികസിക്കുന്നത്. പൊക്കംവക്കാനും കണക്കുസാറിന് അപകടമുണ്ടായി പരീക്ഷ മാറ്റിവക്കാനുമൊക്കെ ആത്മാര്‍ത്ഥമായി പ്രാര്‍ഥിക്കുന്ന, വിശുദ്ധനാകാന്‍ ആഗ്രഹിക്കുന്ന കുട്ടി.  ഔസേപ്പച്ചനായി അഭിനയിച്ച ആദിഷിന് മികച്ച ബാലതാരത്തിനുള്ള ദേശീയ അവാർഡ് കിട്ടിയതിൽ യാതൊരു അതിശയോക്തിയുമില്ലെന്ന് ചിത്രത്തിലെ മികച്ച പ്രകടനം തെളിയിക്കുന്നു. പ്രധാന വേഷങ്ങൾ ചെയ്യുന്ന ജോജുവും സിദ്ധാര്‍ഥ് ശിവയും പോലുള്ള അഭിനേതാക്കൾ മാത്രമല്ല മികച്ച അഭിനയ മുഹൂർത്തങ്ങൾ കാഴ്ച്ച വയ്ക്കുന്നത്. ഹോസ്പിറ്റലിൽ ഡയാലിസിസിന് എത്തുന്ന, ഏതാനും സീനുകളിൽ മാത്രമുള്ള ചെറുപ്പക്കാരൻ നമ്മളെ അത്ഭുതപ്പെടുത്തും. പുതുമുഖങ്ങളുടെ പുതുമ നമുക്ക് അനുഭവിക്കാം. 
       സുന്ദരമായ ക്യാമറാ വർക്ക്. തലനാട് ഗ്രാമത്തിന്റെ ഭംഗിമുഴുവൻ മനോഹരമായി പകർത്തുവാൻ ക്യാമറാമാനു കഴിഞ്ഞിട്ടുണ്ട്. കരഞ്ഞുകൊണ്ട് വീടിനുള്ളിലെ നടയിലിരിക്കുന്ന കൊച്ചുനായകന്റെ പാതി ഇരുൾവീണ മുഖവും ഒഴുകി വീഴുന്ന കണ്ണുനീരും എത്ര സുന്ദരമായാണ് ചിത്രീകരിച്ചിരിക്കുന്നത്. സംവിധായകനും ഛായാഗ്രാഹകനും ഒരുപോലെ അഭിനന്ദനങ്ങൾ.. 
        പശ്ചാത്തല സംഗീതം ചില സീനുകളിൽ നമ്മളെ ആവേശം കൊള്ളിക്കും. മികച്ച എഡിറ്റിംഗ്. ചില കൊച്ചു ദൃശ്യങ്ങൾ പോലും ഭംഗിയായി കൂട്ടിച്ചേർക്കപ്പെട്ടത് ചിത്രത്തിന് ഭംഗി നൽകിയിട്ടുണ്ട്. ഔസേപ്പച്ചന്റെ നെറ്റിയിൽ പെൺകുട്ടിയുടെ അമ്മ നന്ദിയോടും വാത്സല്യപൂർവ്വവും ചുംബിക്കുമ്പോൾ എഡിറ്റിംഗിലൂടെ അതിനിടയിൽ കൂട്ടിച്ചേർത്ത മുയൽ ആ സീനിന് സമ്മാനിക്കുന്നത് ഒരു കുളിർമ്മയും വിശുദ്ധിയുമാണ്.
      നൈർമല്യമുള്ള സ്നേഹം പ്രകടിപ്പിക്കുന്ന ചില സന്ദർഭങ്ങൾ നമ്മുടെ കണ്ണുകളെ ഈറനണിയിപ്പിക്കും.. ചില നിഷ്കളങ്ക സംസാരങ്ങളും പ്രവൃത്തികളും നമ്മെ ചിരിപ്പിക്കും.. മറ്റു ചില ദൃശ്യങ്ങൾ നമ്മെ ഏറെ ചിന്തിപ്പിക്കും.. ഈ ചിത്രം നിർമ്മിക്കുവാൻ മുന്നിട്ടിറങ്ങിയ നിർമ്മാതാക്കൾക്കും പിന്നണിയില്‍ സഹകരിച്ച ഏവര്‍ക്കും നന്ദി..
        ഒരു രക്ഷിതാവെന്ന നിലയിലും ഒരു അധ്യാപകൻ എന്ന നിലയിലും പറയട്ടെ... നമ്മുടെ കുട്ടികൾ ഇത്തരം ചിത്രങ്ങൾ കാണണം.. നായകന്മാരുടെ അമാനുഷിക പ്രകടനങ്ങളുടെയും നായികമാരുടെ കണ്ണിറുക്കലുകളുടെയും ആരാധകരാകുന്നതിനപ്പുറം, നന്മകൾ മനസ്സിൽ മുളപൊട്ടുവാനും നല്ലതു ചിന്തിക്കുവാനും പ്രവൃത്തിക്കുവാനും അങ്ങനെ കുഞ്ഞു ദൈവങ്ങളായി മാറുവാനും ഇത്തരം സിനിമകൾ കുട്ടികളെ പ്രേരിപ്പിക്കും. അതിന് കൂടുതൽ തീയേറ്ററുകളിലേക്ക് ഈ ചിത്രമെത്തണം. ഇപ്പോൾ പ്രദർശിപ്പിക്കുന്ന തീയേറ്ററുകളിൽ കൂടുതൽ പ്രേക്ഷകരുമെത്തണം. നല്ല സിനിമയെ സ്നേഹിക്കുന്ന എല്ലാവരും ഈ കൊച്ചു സിനിമ തീർച്ചയായും കാണണം.
        അവസാനമായി, പ്രിയ ജിയോ ബേബി.. (രചന, സംവിധാനം) നന്ദി.. ഇങ്ങനെയൊരു ലളിത - സുന്ദര ചിത്രം ഞങ്ങൾക്കു സമ്മാനിച്ചതിന് .. ചിത്രത്തിന്റെ അവസാന സീനിൽ ഹെലി ക്യാം ഷോട്ടിലൂടെ ജിയോ പറയാതെ പറയുന്ന നിരവധി സന്ദേശങ്ങളുണ്ടല്ലോ.. ആ ഒരൊറ്റ സീൻ മതി താങ്കളിലെ സംവിധായക മികവ് തിരിച്ചറിയാൻ.. അഭിനന്ദനങ്ങൾ ജിയോ.. നമ്മുടെ നാട്ടില്‍നിന്ന്  ഒരു  അനുഗ്രഹീത കലാകാരന്‍കൂടി അംഗീകരിക്കപ്പെടുന്നതില്‍ ഞങ്ങള്‍ പൂഞ്ഞാറുകാരും അഭിമാനിക്കുന്നു..  Hearty Congratulations..

Friday, January 19, 2018

പൂഞ്ഞാര്‍ സെന്റ് ആന്റണീസില്‍ ശതാബ്ദിയാഘോഷ സമാപന സമ്മേളനം..

      പൂഞ്ഞാര്‍ സെന്റ് ആന്റണീസ് സ്കൂളിന്റെ ശതാബ്ദിയാഘോഷ സമാപന സമ്മേളനം ജലവിഭവ വകുപ്പു മന്ത്രി അഡ്വ. മാത്യു റ്റി. തോമസ് ഉദ്ഘാടനം ചെയ്തു. ശ്രീ.പി.സി.ജോർജ്ജ് എം.ൽ.എ. അദ്ധ്യക്ഷത വഹിച്ച യോഗത്തിൽ പ്രൊവിൻഷ്യാൾ റവ.ഫാ.സെബാസ്റ്റ്യൻ ഇലഞ്ഞിക്കൽ സി.എം.ഐ. മുഖ്യ പ്രഭാഷണം നടത്തി. ഹയർ സെക്കന്ററി സ്കൂൾ മാനേജർ ഫാ.ജെയിംസ് നീണ്ടൂശ്ശേരി സി.എം.ഐ., എൽ.പി. സ്കൂൾ മാനേജർ ഫാ. മാത്യു ചീരാംകുഴി സി.എം.ഐ., ബ്ലോക്ക് പഞ്ചായത്ത് പ്രസിഡന്റ് ശ്രീ.പ്രേംജി ആർ., പഞ്ചായത്ത് പ്രസിഡന്റ് ശ്രീമതി. ഷൈനി സന്തോഷ്, പ്രിൻസിപ്പൽ ശ്രീ. എ.ജെ.ജോസഫ്, ഹെഡ്മാസ്റ്റർ ശ്രീ. വിൽസൺ ഫിലിപ്പ്, എൽ.പി.സ്കൂൾ ഹെഡ്മിസ്ട്രെസ് സി. ഗ്രേസ്, ബ്ലോക്ക് പഞ്ചായത്ത് മെമ്പർമാരായ ശ്രീമതി. ആനിയമ്മ സണ്ണി, ശ്രീമതി. സിന്ധു ഷാജി, ഉപജില്ലാ വിദ്യാഭ്യാസ ഓഫീസർ ശ്രീ. കെ.എസ്. അബ്ദുൾ റസാഖ്, വിദ്യാഭ്യാസ സ്റ്റാന്റിംഗ് കമ്മറ്റി ചെയർപേഴ്സൺ ശ്രീമതി. ബിന്ദു സുരേന്ദ്രൻ, വാർഡ് മെമ്പർമാരായ ശ്രീ. അനിൽകുമാർ മഞ്ഞപ്ലാക്കൽ, ശ്രീമതി. നിർമ്മല മോഹനൻ, പി.റ്റി.എ. പ്രസിഡന്റുമാരായ ശ്രീ. ഡെന്നി പുല്ലാട്ട്, ശ്രീ. ജെയ്സൺ അരീപ്ലാക്കൽ എന്നിവർ പ്രസംഗിച്ചു.

സമ്മേളനത്തിന്റെ കൂടുതല്‍ ചിത്രങ്ങള്‍ ചുവടെ ചേര്‍ത്തിരിക്കുന്നു..

Wednesday, January 17, 2018

മധുരസ്മരണകളുമായി സെന്റ് ആന്റണീസിന്റെ തിരുമുറ്റത്ത് അവര്‍ ഒത്തുകൂടി..


      അറിവുപകര്‍ന്നുതന്ന ഗുരുഭൂതരെ ഏറെക്കാലത്തിനുശേഷം കാണുവാന്‍ സാധിച്ച ശിഷ്യഗണങ്ങളുടെ സ്നേഹാദരങ്ങളും വര്‍ഷങ്ങള്‍ക്കുശേഷം പഴയ ശിഷ്യഗണങ്ങളെ കണ്ട ഗുരുഭൂതരുടെ വാത്സല്യഭാവങ്ങളും ധന്യമാക്കിയ നിമിഷങ്ങളായിരുന്നു പൂഞ്ഞാര്‍ സെന്റ് ആന്റണീസ് സ്കൂളില്‍നടന്ന പൂര്‍വ്വാധ്യാപക-വിദ്യാര്‍ഥി സമ്മേളനം. തങ്ങളുടെ പൂര്‍വ്വ വിദ്യാലയത്തിന് രൂപഭാവങ്ങളില്‍വന്ന പുതിയ മാറ്റങ്ങളും പാഠ്യ-പാഠ്യാനുബന്ധ പ്രവര്‍ത്തനങ്ങളില്‍ വന്നിരിക്കുന്ന സംസ്ഥാനതല മികവും ഏവരേയും സന്തോഷിപ്പിച്ചു. പഴയ ക്ലാസ് മുറികള്‍ കാണുവാന്‍ പള്ളിയോടു ചേര്‍ന്നുള്ള പഴയ സ്കൂള്‍കെട്ടിടത്തിലേക്ക് പോയവരും,പെണ്‍കുട്ടികള്‍ക്കുമാത്രമായുണ്ടായിരുന്ന സ്കൂള്‍ കെട്ടിടം (ഇപ്പോള്‍ ഹയര്‍ സെക്കന്‍ഡറി കെട്ടിടം സ്ഥിതിചെയ്യുന്ന ഭാഗം) കാണാന്‍ സാധിക്കാത്തതില്‍ പരിഭവം പറഞ്ഞവരും നിരവധി. വരുമെന്ന് പറഞ്ഞിരുന്ന സഹപാഠികളില്‍ പലരും എത്തിയില്ലെങ്കിലും ഇത്രയും അധ്യാപകരേയും കൂട്ടുകാരെയും കാണാന്‍ സാധിച്ചതിലും പഠിച്ച സ്കൂളില്‍ വീണ്ടുമൊരിക്കല്‍കൂടി എത്തുവാന്‍ സാധിച്ചതിലുമുള്ള ആഹ്ലാദം ഇവര്‍ പങ്കുവച്ചു.
      സ്കൂള്‍ ഹാളില്‍ ചേര്‍ന്ന പൊതുസമ്മേളനം, എം.ജി. സര്‍വ്വകലാശാല മുന്‍ വൈസ് ചാന്‍സിലര്‍ ഡോ.സിറിയക് തോമസ് ഉദ്ഘാടനം ചെയ്തു. പാലാ രൂപത മുന്‍ വികാരി ജനറാള്‍ റവ. ഫാ. ഫിലിപ്പ് ഞരളക്കാട്ട് യോഗത്തില്‍ അധ്യക്ഷത വഹിച്ചു. ഹയര്‍ സെക്കന്‍ഡറി സ്കൂള്‍ മാനേജര്‍ ഫാ. ജെയിംസ് നീണ്ടൂശ്ശേരി സി.എം.ഐ. അനുഗ്രഹപ്രഭാഷണം നടത്തി. എല്‍.പി. സ്കൂള്‍ മാനേജര്‍ ഫാ. മാത്യു ചീരാംകുഴി സി.എം.ഐ., മിനച്ചില്‍ ഈസ്റ്റ് അര്‍ബന്‍ കോ-ഓപ്പറേറ്റീവ് ബാങ്ക് ചെയര്‍മാന്‍ ശ്രീ. കെ.എഫ്.കുര്യന്‍, പ്രിന്‍സിപ്പാള്‍ ശ്രീ. എ.ജെ. ജോസഫ്, ഹെഡ്മാസ്റ്റര്‍ ശ്രീ. വില്‍സണ്‍ ഫിലിപ്പ്, വാര്‍ഡ് മെമ്പര്‍മാരായ ശ്രീ. അനില്‍കുമാര്‍ മഞ്ഞപ്ലാക്കല്‍, ശ്രീമതി. നിര്‍മ്മല മോഹനന്‍, പി.റ്റി.എ, പ്രസിഡന്റുമാരായ ശ്രീ. ഡെന്നി പുല്ലാട്ട്, ശ്രീ. ജെയ്സണ്‍ അരീപ്ലാക്കല്‍, അധ്യാപകരായ ശ്രീ. ബൈജു ജേക്കബ്, ശ്രീമതി. ഷൈനി മാത്യു, പൂര്‍വ്വാധ്യാപക-വിദ്യാര്‍ഥി പ്രതിനിധികള്‍ എന്നിവര്‍ പ്രസംഗിച്ചു. 
     സമ്മേളനത്തില്‍ പങ്കെടുത്തവരില്‍ ഏറ്റവും മുതിര്‍ന്ന അധ്യാപകനായ ശ്രീ. എ.വി. ജോര്‍ജ്ജ്, മുതിര്‍ന്ന പൂര്‍വ്വവിദ്യാര്‍ഥി ശ്രീ. പാപ്പച്ചന്‍ കല്ലാറ്റ് എന്നിവരെ പൊന്നാടയണിച്ച് ആദരിച്ചു. എല്‍.പി. സ്കൂളിലെ അദ്ധ്യാപകരും പൂര്‍വ്വാധ്യാപകരുംചേര്‍ന്ന് ജൂബിലി ഗാനം ആലപിച്ചു. സമ്മേളനത്തില്‍ പങ്കെടുത്ത എല്ലാവര്‍ക്കും ഉച്ചഭക്ഷണവും ഒരുക്കിയിരുന്നു.

സമ്മേളനത്തിന്റെ കൂടുതല്‍ ചിത്രങ്ങള്‍ ചുവടെ ചേര്‍ത്തിരിക്കുന്നു..

Monday, November 13, 2017

ഈരാറ്റുപേട്ട ഉപജില്ലാ കലോത്സവം 2017

ഈരാറ്റുപേട്ട ഗവ. ഹയര്‍ സെക്കന്‍ഡറി സ്കൂളില്‍ നടക്കുന്ന ഉപജില്ലാ കലോത്സവത്തിന്റെ 
റിസല്‍ട്ടിനായി ഇവിടെ ക്ലിക്ക് ചെയ്യുക.. 
(റിസല്‍ട്ടുകള്‍ പൂര്‍ണ്ണമായി പ്രസിദ്ധീകിച്ചിരിക്കുന്നു.)

School wise Point - Click Here


കലോത്സവ വിജയികള്‍ക്ക് ആശംസകളുമായി സിനിമാനടന്‍ ജയറാം എത്തുന്നു..
ഈരാറ്റുപേട്ട ഉപജില്ലാ കലോത്സവത്തിന്റെ സമാപന ചടങ്ങില്‍  സിനിമാ നടന്‍ ജയറാം പങ്കെടുക്കുന്നു. ഈരാറ്റുപേട്ട ഗവ. ഹയര്‍ സെക്കന്‍ഡറി സ്കൂളില്‍ നടക്കുന്ന കലോത്സവത്തിന്റെ സമാപന സമ്മേളനത്തിലാണ് വിശിഷ്ടാതിഥിയായി ജയറാം എത്തിച്ചേരുന്നത്. നവംബര്‍ 17, വെള്ളിയാഴ്ച്ച വൈകിട്ട്  6 മണിക്ക് സമ്മേളനം ആരംഭിക്കും.

Thursday, November 9, 2017

'കാഴ്ച' സമ്മാനിച്ച കാഴ്ച്ചപ്പാടുകള്‍..

   കേരള ചലച്ചിത്ര അക്കാദമിയും സീമാറ്റും വിദ്യാരംഗം കലാസാഹിത്യവേദിയും ചേര്‍ന്ന് കേരളത്തിലെ സ്കൂള്‍ അധ്യാപകര്‍ക്കായി സംഘടിപ്പിച്ച ചലച്ചിത്രാസ്വാദന ശില്‍പ്പശാലയായ 'കാഴ്ച'യില്‍ പങ്കെടുത്ത കോട്ടയം ജില്ലയിലെ ഏക അധ്യാപകന്‍ എന്ന അഭിമാനത്തോടെ പറയട്ടെ.. സിനിമയോടുള്ള എന്റെ കാഴ്ച്ചപ്പാടുകളെതന്നെ മാറ്റിക്കളഞ്ഞു ഈ 'കാഴ്ച'..
      പ്രശസ്ത സംവിധായകനും ചലച്ചിത്രഅക്കാദമി ചെയര്‍മാനുമായ ശ്രീ. കമല്‍, പിറവി, ദയ, വാസ്തുഹാര, ഒരു ചെറുപുഞ്ചിരി, ട്രെയിന്‍ ടു പാക്കിസ്ഥാന്‍ തുടങ്ങിയ ചിത്രങ്ങളിലൂടെ ദൃശ്യത്തിന്റെ വിവിധ തലങ്ങള്‍ ലോകത്തിനു സമ്മാനിച്ച പ്രശസ്ത ക്യാമറാമാന്‍ ശ്രീ. സണ്ണി ജോസഫ്, അഗ്നിസാക്ഷി, ദയ, ജനനി, മഴ, ഒരു ചെറുപുഞ്ചിരി, മേഘമല്‍ഹാര്‍, കൈയൊപ്പ്, വിലാപങ്ങള്‍പ്പുറം, മുന്നറിയിപ്പ് തുടങ്ങിയ ചിത്രങ്ങളിലൂടെ എഡിറ്റിംഗ് രംഗത്തെ ശ്രദ്ധേയ സ്ത്രീ സാന്നിധ്യമായി മാറിയ ശ്രീമതി. ബീനാ പോള്‍, സീനിയര്‍ ജേര്‍ണലിസ്റ്റും സിനിമാ നിരൂപകനും ചലച്ചിത്ര പ്രവര്‍ത്തകനും പ്രേജിയുടെ മകനുമായ ശ്രീ. നീലന്‍, എഴുത്തുകാരനും ചലച്ചിത്ര നിരൂപകനും മലയാളത്തിലെ ആദ്യ സിനിമാ ചരിത്ര ഗ്രന്ഥകര്‍ത്താവും സംവിധായകനുമായ ശ്രീ. വിജയകൃഷ്ണന്‍, അന്തര്‍ദേശീയ-ദേശീയ-സംസ്ഥാന അവാര്‍ഡു ജേതാക്കളും എഴുത്തുകാരും നിരൂപകരും മാധ്യമ പ്രവര്‍ത്തകരുമായ ഡോ.സി.എസ്. വെങ്കിടേശ്വരന്‍, ഡോ. ആര്‍.ചന്ദ്രശേഖര്‍, ഡോ. ജി.ആര്‍.സന്തോഷ് കുമാര്‍, ശ്രീ. ജി.പി. രാമചന്ദ്രന്‍, ശ്രീമതി. മീന റ്റി. പിള്ള, ശ്രീ. വി.കെ. ജോസഫ് തുടങ്ങിയവര്‍ പങ്കുവച്ച അനുഭവങ്ങളും പകര്‍ന്നുതന്ന പുതിയ അറിവുകളും ദര്‍ശനങ്ങളും ഏറെ വിലപ്പെട്ടതായിരുന്നു.
      പൊതു വിദ്യാഭ്യാസ ഡയറക്ടര്‍ ശ്രീ. കെ.വി. മോഹന്‍കുമാര്‍ IAS-ന്റെ പ്രത്യേക താത്പ്പര്യത്തില്‍ നടന്ന ഈ ത്രിദിന ശില്‍പ്പശാല ഇത്ര ഹൃദ്യവും ഉപകാരപ്രദവുമായതില്‍ അദ്ദേഹത്തോടും സീമാറ്റ് ഡയറക്ടര്‍ ഡോ.എം.. ലാലിനോടും കേരളസംസ്ഥാന ചലച്ചിത്ര അക്കാദമിയോടും വിദ്യാരംഗം കലാ സാഹിത്യവേദി സ്റ്റേറ്റ് കോ-ഓര്‍ഡിനേറ്റര്‍ കെ.സി.അലി ഇക്ബാല്‍ സാറിനോടും ക്യാമ്പ് ഡയറക്ടര്‍ വി.എസ്. ബിന്ദു ടീച്ചറിനോടും ആദ്യംതന്നെ നന്ദി പറഞ്ഞുകൊള്ളട്ടെ.
      കാഴ്ചയില്‍നിന്നു ലഭിച്ച ചില അറിവുകള്‍ ചുവടെ പങ്കുവക്കുകയാണ്. മണിക്കൂറുകള്‍ നീളുന്ന ക്ലാസുകളില്‍ കണ്ടതും കേട്ടതും അനുഭവിച്ചറിഞ്ഞതുമായ വിശേഷങ്ങള്‍ ഏതാനും വാചകങ്ങളിലൊതുക്കുന്നത് അസാധ്യമെങ്കിലും സിനിമയില്‍ താത്പ്പര്യമുള്ള അധ്യാപകര്‍ക്കും മറ്റു സുഹൃത്തുക്കള്‍ക്കും ഉപകാരപ്രദമാകുമെന്ന് കരുതി ആ സാഹസത്തിന് മുതിരുകയാണ്.