Thursday, December 30, 2010

കുന്നോന്നി സെന്റ് ജോസഫ്സ് ദേവാലയത്തില്‍ തിരുനാളിന് കൊടിയേറി

കുന്നോന്നി : കുന്നോന്നി സെന്റ് ജോസഫ്സ് ദേവാലയത്തില്‍ പരിശുദ്ധ ദൈവമാതാവിന്റെയും വിശുദ്ധ യൗസേഫ് പിതാവിന്റെയും തിരുനാളിന് കൊടിയേറി (2010 ഡിസംബര്‍ 31, 2011 ജനുവരി 1,2,3). തിരുനാള്‍ തിരുക്കര്‍മ്മങ്ങള്‍ വിശദമായി മനസിലാക്കുന്നതിനും   ദൈവാലയാങ്കണത്തില്‍ ഉയര്‍ന്നിരിക്കുന്ന വിസ്മയപ്പുല്‍ക്കൂടിന്റെ വിശേഷങ്ങളറിയാനുമായി ഇവിടെ ക്ലിക്ക് ചെയ്യുക.

Monday, December 27, 2010

ഫാ. ഡൈനോ മങ്ങാട്ടുകുന്നേല്‍ CST -യ്ക്ക് പൂഞ്ഞാര്‍ ഗ്രാമത്തിന്റെ ആശംസകളും പ്രാര്‍ഥനകളും...

പൂഞ്ഞാര്‍ : 28/12/2010 ചൊവ്വാഴ്ച്ച , പൂഞ്ഞാര്‍ സെന്റ് മേരീസ് ഫൊറോന ദൈവാലയത്തില്‍വച്ച് പൗരോഹിത്യം സ്വീകരിക്കുകയും തുടര്‍ന്ന് നവപൂജ അര്‍പ്പിക്കുകയും ചെയ്ത ഫാ. ഡൈനോ മങ്ങാട്ടുകുന്നേല്‍ CST -യ്ക്ക് പൂഞ്ഞാര്‍ ഗ്രാമത്തിന്റെ ആശംസകളും പ്രാര്‍ഥനകളും... പൂഞ്ഞാര്‍ മങ്ങാട്ടുകുന്നേല്‍ തങ്കച്ചന്‍ - മേരി ദമ്പതികളുടെ മകനാണ് ഇദ്ദേഹം.

Saturday, December 25, 2010

വിസ്മയപ്പുല്‍ക്കൂട് : ഒരു ഗ്രാമത്തിന്റെ കൂട്ടായ്മയുടെ വിസ്മയകാഴ്ചകള്‍

     കുന്നോന്നി : ജാതി - മത വ്യത്യാസമില്ലാതെ ഒരു ഗ്രാമത്തിലെ ജനങ്ങള്‍ ഏകമനസോടെ പ്രവര്‍ത്തിച്ചതിന്റെ പ്രതിഫലമാണ് കുന്നോന്നി സെന്റ് ജോസഫ്സ് ദൈവാലയാങ്കണത്തില്‍ ഉയര്‍ന്നിരിക്കുന്ന വിസ്മയപ്പുല്‍ക്കൂട്. ഇടവക വികാരി ഫാ. ജോസ് വടക്കേനെല്ലിക്കാട്ടിലിന്റെ നേതൃത്വത്തില്‍ നൂറ്കണക്കിന് ജനങ്ങളുടെ രാപകല്‍ നീണ്ട അധ്വാന ഫലമാണ് ഈ വിസ്മയക്കാഴ്ച.
      പുല്‍ക്കൂടിലെ ഓരോ കാഴ്ചകളും പ്രത്യേക അര്‍ഥങ്ങള്‍ ഉള്ളതാണ്. അതു മനസ്സിലാക്കി പുല്‍ക്കൂട് സന്ദര്‍ശിക്കുന്നത് ഒരു നവ്യാനുഭവമായിരിക്കും. ഇതിനായി  
ഇവിടെ ക്ലിക്ക് ചെയ്യുക.

Friday, December 24, 2010

ഓലിയാനിയില്‍ അംഗന്‍വാടി ഉദ്ഘാടനം ചെയ്തു

കുന്നോന്നി : അഞ്ചുവയസില്‍ താഴെയുള്ള കുട്ടികളുടെ വിദ്യാഭ്യാസത്തിനും അമ്മമാരുടെയും കുട്ടികളുടെയും ആര്യോഗ്യസംരക്ഷണത്തിനും വേണ്ടി സാമൂഹ്യക്ഷേമവകുപ്പിന്റെ കീഴില്‍ എല്ലാ ഗ്രാമങ്ങളിലും അംഗന്‍വാടികള്‍ പ്രവര്‍ത്തിച്ചുവരികയാണ്.ആയിരം ജനസംഖ്യക്ക് ഒരു അംഗന്‍വാടി എന്നതാണ് സര്‍ക്കാര്‍സ്വീകരിച്ച നയം. അതിന്റെ അടിസ്ഥാനത്തില്‍ പൂഞ്ഞാര്‍ തെക്കേക്കര പഞ്ചായത്തില്‍ പന്ത്രണ്ടാം വാര്‍ഡില്‍ അനുവദിച്ച അംഗന്‍വാടി ,  ഓലിയാനിഭാഗത്ത് ആരംഭിച്ചു. അംഗന്‍വാടിയുടെ ഔപചാരിക ഉദ്ഘാടനം പൂഞ്ഞാര്‍ തെക്കേക്കര പഞ്ചായത്ത് പ്രസിഡന്റ്  എ. റ്റി. ജോര്‍ജ്ജ് അരീപ്ലാക്കല്‍ നിര്‍വഹിച്ചു. വാര്‍ഡ് മെമ്പര്‍  സിന്ധു ഷാജി അദ്ധ്യക്ഷത വഹിച്ച സമ്മേളനത്തില്‍  ഷൈലജ കെ.ജി. (സി.ഡി.പി.ഒ. ഈരാറ്റുപേട്ട) മുഖ്യപ്രഭാഷണം നടത്തി.

Thursday, December 23, 2010

ചെമ്പകത്തിനാല്‍ സി. എം. വര്‍ക്കിസാര്‍ നിര്യാതനായി




പാതാമ്പുഴ : ചെമ്പകത്തിനാല്‍  സി. എം. വര്‍ക്കി (68)  (റിട്ട.അധ്യാപകന്‍ , സെന്റ്. ആന്റണീസ്  ഹൈസ്കൂള്‍  പൂഞ്ഞാര്‍)  നിര്യാതനായി. സംസ്കാരച്ചടങ്ങുകള്‍ 24/10/2010  വെളളിയാഴ്ച രാവിലെ 10-മണിക്ക്  വീട്ടില്‍  ആരംഭിച്ച്  മണിയംകുന്ന്  തിരുഹ്രുദയ  ദേവാലയത്തില്‍.

ത്രിവേണി സൂപ്പര്‍മാര്‍ക്കറ്റ് & നീതി മെഡിക്കല്‍ സ്റ്റോര്‍ , പൂഞ്ഞാര്‍

       ഗുണമേന്മയുളള നിത്യോപയോഗ സാധനങ്ങള്‍ ഏറ്റവും കുറഞ്ഞ വിലയില്‍ വില്‍പന  നടത്തി കേരളത്തിലെ സാധരണ ജനങ്ങള്‍ക്ക് ആശ്വാസം പകരുന്ന കണ്‍സ്യൂമര്‍ഫെഡ് അത്യാധുനിക സജ്ജീകരണങ്ങളോടു കൂടിയ ത്രിവേണി സൂപ്പര്‍മാര്‍ക്കറ്റും നീതി മെഡിക്കല്‍ സ്റ്റോറും  പൂഞ്ഞാറില്‍ സജ്ജീകരിച്ചിരിക്കുന്നു.
       നിത്യോപയോഗ സാധനങ്ങളുടെ വിലക്കയറ്റം രൂക്ഷമാകുന്ന സാഹചര്യത്തില്‍ പൊതുവിപണിയില്‍ ശക്തമായി ഇടപെട്ട് സാധാരണക്കാര്‍ക്ക് വിലകുറച്ച് ഗുണമേന്മയുളള സാധനങ്ങള്‍ നല്‍കുക
എന്ന സര്‍ക്കാര്‍ നയത്തിന്റെ ഭാഗമായാണ് നൂറ്റിഅന്‍പത്തിരണ്ടാമത്തെ ത്രിവേണി സൂപ്പര്‍ മാര്‍ക്കറ്റ് എല്ലാ നിത്യോപയോഗ സാധനങ്ങളോടും കൂടി ഒരു കുടക്കീഴില്‍ വിതരണത്തിനായി ഒരുക്കിയിരിക്കുന്നത്.
       കേരളത്തിലെ സാധാരണക്കാരായ ജനങ്ങള്‍ക്ക് ജീവന്‍ രക്ഷാ മരുന്നുകള്‍ ഉള്‍പ്പെടെയുളള അവശ്യമരുന്നുകള്‍ 12% മുതല്‍ 40% വരെ വില കുറച്ച് നല്‍കി അവര്‍ക്ക് സമാശ്വാസം പകര്‍ന്നുകൊണ്ട് കണ്‍സ്യൂമര്‍ഫെഡ് നേരിട്ട് നടത്തുന്ന എഴുപത്തിമൂന്നാമത്തെ നീതി മെഡിക്കല്‍ സ്റ്റോറും ഇതോടാപ്പം പ്രവര്‍ത്തനം ആരംഭിച്ചിരിക്കന്നു. പി.സി.ജോര്‍ജ്ജ് എം.എല്‍.എ ഇവയുടെ ഉദ്ഘാടനകര്‍മ്മം നിര്‍വഹിച്ചു.

Sunday, December 19, 2010

" ഹൃദയങ്ങളെ പുല്‍ക്കൂടുകളാക്കുക " ഫാ. ജോസഫ് പൂവത്തുങ്കല്‍


പൂഞ്ഞാര്‍ : നമ്മുടെ ഹൃദയങ്ങളെ ഉണ്ണിയീശോയ്ക്ക് പിറക്കുവാനുള്ള പുല്‍ക്കൂടുകളാക്കി മാറ്റണമെന്ന്  പൂഞ്ഞാര്‍ സെന്റ് മേരീസ് ഫൊറോന വികാരി ഫാ. ജോസഫ് പൂവത്തുങ്കല്‍ പറഞ്ഞു. പൂഞ്ഞാര്‍ സെന്റ് മേരീസ് സണ്‍ഡേ സ്കൂളിന്റെ ക്രിസ്തുമസ് ആഘോഷച്ചടങ്ങില്‍ സംസാരിക്കുകയായിരുന്നു അദ്ദേഹം. ക്രിസ്തുമസ് സന്ദേശം പകര്‍ന്ന സ്കിറ്റും കരോള്‍ ഗാനവും ആശംസകളും കേയ്ക്കും ചടങ്ങിന് മോടിയും മാധുര്യവുമേകി. സണ്‍ഡേ സ്കൂള്‍ ഡയറക്റ്റര്‍ ഫാ. ജെയിംസ് പൊരുന്നോലില്‍ , ഹെഡ്മാസ്റ്റര്‍ സ്റ്റാന്‍ലി തകിടിയേല്‍ തുടങ്ങിയവര്‍ സംസാരിച്ചു.

കേരളോത്സവം 2010


Wednesday, December 15, 2010

നവീകരിക്കപെട്ട പെരിങ്ങുളം തിരുഹൃദയ ദൈവാലയത്തിന്റെ കൂദാശാകര്‍മ്മം നടന്നു

     നിര്‍മ്മാണം പൂര്‍ത്തീകരിച്ച് നവീകരിക്കപെട്ട പെരിങ്ങുളം തിരുഹൃദയ ദൈവാലയത്തിന്റെ കൂദാശാകര്‍മ്മം 2010 ഡിസംബര്‍ ഇരുപത്തിരണ്ടാം തീയതി ബുധനാഴ്ച പാലാ രൂപത അദ്ധ്യക്ഷന്‍ മാര്‍ ജോസഫ് കല്ലറങ്ങാട്ട് നിര്‍വ്വഹിച്ചു.

Tuesday, December 14, 2010

പിഴകൂടാതെ വിവാഹ രജിസ്ട്രേഷന്‍ നടത്തുവാനുള്ള അവസാന തീയതി ഡിസംബര്‍ 31-ന് അവസാനിക്കുന്നു.

          പിഴകൂടാതെ വിവാഹ രജിസ്ട്രേഷന്‍ നടത്തുവാനുള്ള അവസാന തീയതി ഡിസംബര്‍ 31-ന് അവസാനിക്കുന്നു.എത്രവര്‍ഷം മുന്‍പു നടന്ന വിവാഹമാണെങ്കിലും ഈ തിയതിയ്ക്കു മുന്‍പായി പഞ്ചായത്തില്‍ രജിസ്റ്റര്‍ ചെയ്യുവാന്‍ സാധിക്കും.45 ദിവസങ്ങള്‍ക്കുള്ളില്‍ വിവാഹം നടന്ന പഞ്ചായത്തില്‍ രജിസ്ട്രേഷന്‍ നടത്തിയിരിക്കണം എന്നതാണ് നിലവിലുള്ള നിയമം.
          ഡിസംബര്‍ 31 -നു ശേഷം വിവാഹം രജിസ്റ്റര്‍ ചെയ്യുവാനായി ഫൈനും , DDP യുടെ അനുമതിയും ആവശ്യമായി വരും. ഭാവിയില്‍ പലവിധ ആവശ്യങ്ങള്‍ക്കും (പ്രത്യേകിച്ച് വിദേശയാത്രകള്‍ക്ക്) ഈ സര്‍ട്ടിഫിക്കറ്റ് ആവശ്യമായി വരും എന്നതിനാല്‍ വര്‍ഷങ്ങള്‍ക്കു മുന്‍പ് നടന്ന വിവാഹങ്ങളും രജിസ്റ്റര്‍ ചെയ്യുന്നത് അഭികാമ്യമായിരിക്കും .
വിശദവിവരങ്ങള്‍ക്ക് മുകളില്‍ കാണുന്ന പഞ്ചായത്ത് അറിയിപ്പുകള്‍ എന്ന പേജ് സന്ദര്‍ശിക്കുക

Friday, December 10, 2010

സംസ്ഥാന ശാസ്ത്ര-ഗണിതശാസ്ത്രമേളകളിലേയ്ക്ക് 'പൂഞ്ഞാറിന്റെ കുരുന്നുകള്‍ 'യോഗ്യത നേടി

      പൂഞ്ഞാര്‍ : കിടങ്ങൂരില്‍ നടന്ന കോട്ടയം റവന്യൂജില്ലാ ഗണിതശാസ്ത്രമേളയില്‍ മികവുതെളിയിച്ചുകൊണ്ട് പൂഞ്ഞാറിലെ വിവിധ സ്കൂളുകളില്‍ നിന്നായി കൊച്ചുശാസ്ത്ര-ഗണിതശാസ്ത്രജ്ഞര്‍ സംസ്ഥാന മേളയിലേയ്ക്ക് യോഗ്യത നേടി.

സെന്റ് ആന്റണീസ് എച്ച്.എസ്.സ്. പൂഞ്ഞാര്‍
അര്‍പ്പണ സണ്ണി ( HS സ്റ്റഫ്ഡ് റ്റോയ്സ്- ഫസ്റ്റ് എ ഗ്രേഡ്)
അര്‍ച്ചിഷ്മാന്‍ P.M. (UP ചോക്ക് നിര്‍മ്മാണം - ഫസ്റ്റ് എ ഗ്രേഡ്)
ഗൗതം കൃഷ്ണ ( UP Still Model-സെക്കന്‍ഡ് എ ഗ്രേഡ് )















സെന്റ് ജോസഫ്സ് യു.പി.എസ്. മണിയംകുന്ന്
അഭിരാമി ബാലകൃഷ്ണന്‍ (UP ഭാസ്കരാചാര്യ പേപ്പര്‍ പ്രസന്റേഷന്‍ -സെക്കന്‍ഡ് എ ഗ്രേഡ് )
സെന്റ് മരിയ ഗൊരേത്തി എച്ച്.എസ്. ചേന്നാട്
ഔസേപ്പച്ചന്‍ തോമസ് ( HS Other Chart-ഫസ്റ്റ് എ ഗ്രേഡ് ) , ജിഷ്ണു ജയരാജ് (HS Geometrical Chart-സെക്കന്‍ഡ് എ ഗ്രേഡ് )

Monday, December 6, 2010

ഉപജില്ലാ കലോത്സവത്തില്‍ പൂഞ്ഞാര്‍ സെന്റ് ആന്റണീസിന് മികച്ച നേട്ടം

            ഈരാറ്റുപേട്ട ഉപജില്ല കലോത്സവത്തില്‍ പൂഞ്ഞാര്‍ സെന്റ് ആന്റണീസ് ഹയര്‍ സെക്കന്ററി സ്കൂള്‍ ഓവറോള്‍ കിരീടങ്ങള്‍ കരസ്ഥമാക്കിക്കൊണ്ട് മികച്ച നേട്ടം കൈവരിച്ചു.യു.പി.വിഭാഗത്തില്‍ ഓവറോള്‍ ഫസ്റ്റും ഹൈസ്കൂള്‍,ഹയര്‍ സെക്കന്ററി വിഭാഗങ്ങളില്‍ ഓവറോള്‍ തേര്‍ഡും സ്വന്തമാക്കാന്‍ സ്കൂളിനു കഴിഞ്ഞു.മികച്ച വിജയം കൈവരിച്ച കുട്ടികളെയും പരിശീലിപ്പിച്ച അധ്യാപകരെയും സ്കൂള്‍ മാനേജര്‍ ഫാ.സേവ്യര്‍ കിഴക്കേമ്യാലില്‍,പി.റ്റി.എ. പ്രസിഡന്റ് മാത്യൂസ് മുതിരേന്തിക്കല്‍,ഹെഡ്മാസ്റ്റര്‍ T.M ജോസഫ്,പ്രിന്‍സിപ്പാള്‍ എ.ജെ.ജോസഫ് തുടങ്ങിയവര്‍ അഭിനന്ദിച്ചു.

യു.പി.വിഭാഗത്തില്‍ ഓവറോള്‍ ഫസ്റ്റ് കരസ്തമാക്കിയ ടീമംഗങ്ങള്‍ സ്കൂള്‍ മാനേജര്‍ ഫാ.സേവ്യര്‍ കിഴക്കേമ്യാലില്‍,ഹെഡ്മാസ്റ്റര്‍ T.M ജോസഫ് , ടീം മാനേജര്‍ ആലീസ് ജേക്കബ് എന്നിവര്‍ക്കൊപ്പം

Saturday, December 4, 2010

ഈരാറ്റുപേട്ട ഉപജില്ല കലോത്സവം സമാപിച്ചു


       മൂന്നു ദിവസമായി ഈരാറ്റുപേട്ട MGHSS-ല്‍ നടന്നുവരുന്ന കലയുടെ മാമാങ്കത്തിന് ഇന്ന് തിരശീല വീണു. വൈകുന്നേരം 4.00-ന് നടന്ന സമാപന സമ്മേളനം ആന്റോ ആന്റണി M.P.ഉദ്ഘാടനം ചെയ്തു.ജില്ലാ പഞ്ചായത്ത് മെമ്പര്‍ ബീനാമ്മ ഫ്രാന്‍സീസ് അദ്ധ്യക്ഷത വഹിച്ച യോഗത്തില്‍  ആര്‍.ഗീത  [HM-MGHSS Erattuprtta]  സ്വാഗതവും പ്രോഗ്രാം കമ്മറ്റി കണ്‍വീനര്‍ പി.വി.ഷാജിമോന്‍ കൃതജ്ഞതയും രേഖപ്പെടുത്തി. ചടങ്ങില്‍ ബ്ലോക്ക്-ഗ്രാമപഞ്ചായത്ത് മെമ്പര്‍മാരും പങ്കെടുത്തു.



ഓവറോള്‍ ജേതാക്കള്‍

LP GENERAL
ഓവറോള്‍ ഫസ്റ്റ് - St Mary's LPS Teekoy (51)
ഓവറോള്‍ സെക്കന്റ് - St Joseph's UPS Maniamkunnu (49)
ഓവറോള്‍ തേര്‍ഡ് - St Antony's HS Vellikulam (45)
UP GENERAL
ഓവറോള്‍ ഫസ്റ്റ് - St Antony's HSS Poonjar (71)
ഓവറോള്‍ സെക്കന്റ് - MGHSS Erattupetta (69)
ഓവറോള്‍ തേര്‍ഡ് - St Joseph's UPS Maniamkunnu (67)
HS GENARAL
ഓവറോള്‍ ഫസ്റ്റ് - LF HS Chemmalamattom (154)
ഓവറോള്‍ സെക്കന്റ് - MGHSS Erattupetta (122)
ഓവറോള്‍ തേര്‍ഡ് - St Antony's HSS Poonjar (92)
HSS GENERAL
ഓവറോള്‍ ഫസ്റ്റ് - MGHSS Erattupetta (138)
ഓവറോള്‍ സെക്കന്റ് - St Mary's HSS Teekoy (127)
ഓവറോള്‍ തേര്‍ഡ് - St Antony's HSS Poonjar (90)
UP SANKRIT
ഓവറോള്‍ ഫസ്റ്റ് - CMS UPS Edamala (79)
ഓവറോള്‍ സെക്കന്റ് - SGM UPS Olayanad (55)
ഓവറോള്‍ തേര്‍ഡ് - SMV HSS Poonjar (48)
HS SANKRIT
ഓവറോള്‍ ഫസ്റ്റ് - SMV HSS Poonjar (70)
LP ARABIC
ഓവറോള്‍ ഫസ്റ്റ് - Hayathudheen LPS Aruvithura (45)
ഓവറോള്‍ സെക്കന്റ് - MMM UM UPS Karakkad (37)
ഓവറോള്‍ തേര്‍ഡ് - PMSA PTM LPS Kaduvamuzhy (35)
UP ARABIC
ഓവറോള്‍ ഫസ്റ്റ് - MMM UM UPS Karakkad (65)
ഓവറോള്‍ സെക്കന്റ് - MGHSS Erattupetta (47)
ഓവറോള്‍ തേര്‍ഡ് - SMV HSS Poonjar (30)
HS ARABIC
ഓവറോള്‍ ഫസ്റ്റ് - MGHSS Erattupetta (77)
ഓവറോള്‍ സെക്കന്റ് - SMV HSS Poonjar (64)
ഓവറോള്‍ തേര്‍ഡ് - Govt. HSS Erattuprtta

Tuesday, November 30, 2010

പൂഞ്ഞാര്‍ ഗ്രാമത്തിന് സെന്റ് ആന്റണീസ് കുടുംബത്തിന്റെ സ്നേഹസമ്മാനം... ' പൂഞ്ഞാര്‍ ന്യൂസ് '

  പൂഞ്ഞാര്‍ സെന്റ് ആന്റണീസ് ഹയര്‍ സെക്കന്ററി സ്കൂളിലെ അന്റോണിയന്‍ ക്ലബ് നേതൃത്വം നല്‍കുന്ന ന്യൂസ് ബ്ലോഗായ 'പൂഞ്ഞാര്‍ ന്യൂസ് ' ആരംഭിച്ചു. ബ്ലോഗിന്റെ ഉദ്ഘാടന കര്‍മ്മം പഞ്ചായത്ത് പ്രസിഡന്റ് എ.റ്റി. ജോര്‍ജ് (അപ്പച്ചന്‍) അരീപ്ലാക്കല്‍ നിര്‍വഹിച്ചു. വാര്‍ഡ് മെമ്പര്‍ അനില്‍ കുമാര്‍ മഞ്ഞപ്ലാക്കല്‍ , സ്കൂള്‍ മാനേജര്‍ ഫാ.സേവ്യര്‍ കിഴക്കേമ്യാലില്‍ , പി.റ്റി.എ. പ്രസിഡന്റ് എം.സി.മാത്യൂസ് മുതിരേന്തിക്കല്‍ , പ്രിന്‍സിപ്പാള്‍ എ.ജെ. ജോസഫ് , ഹെഡ്മാസ്റ്റര്‍ റ്റി.എം. ജോസഫ് , പി. റ്റി​. എ. ഭാരവാഹികള്‍ തുടങ്ങിയവര്‍ ചടങ്ങില്‍ സംബന്ധിച്ചു.



'പൂഞ്ഞാര്‍  ന്യൂസ് '..ഇത് അന്റോണിയന്‍ ക്ലബ് നേതൃത്വം നല്‍കുന്ന ന്യൂസ് ബ്ലോഗ് .
         സ്വയം വളരുകയും വീടിനും നാടിനും ഉപകാരികളായി വളര്‍ന്നുവരുകയും ചെയ്യുന്ന , വ്യക്തിത്വ വികസനവും സാമൂഹ്യസേവനവും ലക്ഷ്യമാക്കിയ , പൂഞ്ഞാര്‍ സെന്റ് ആന്റണീസ് സ്കൂളിലെ  ഒരു സംഘം കുട്ടികളുടെ കൂട്ടായ്മയാണ്  അന്റോണിയന്‍ ക്ലബ്.
പൂഞ്ഞാര്‍  ന്യൂസിന്റെ ഉത്ഭവം..
        പത്രപ്രവത്തനത്തിന്റെ സാധ്യതകള്‍ മനസ്സിലാക്കുവാനും കുട്ടികളുടെ കഴിവുകളും അഭിരുചികളും കണ്ടെത്തി വികസിപ്പിക്കുവാനും പൂഞ്ഞാര്‍ സെന്റ് ആന്റണീസ് സ്കൂളില്‍ നിന്നും   2007-ല്‍, 'അന്റോണിയന്‍' എന്ന പേരില്‍ ഒരു സ്കൂള്‍ പത്രം പുറത്തിറങ്ങി. 2008-ലും,വര്‍ഷത്തില്‍ ഒന്നു മാത്രമുള്ള ഈ പത്രം പ്രസിധീകരിച്ചു.
     2009-ല്‍ നാടിന്റെ വാര്‍ത്തകള്‍ കൂടി പ്രസിധീകരിക്കുന്ന ഒരു ത്രൈമാസ പത്രമായി അന്റോണിയന്‍ മാറി.
     2010-ല്‍ അന്റോണിയന്‍ , ന്യൂസ് ബ്ലോഗിന്റെ രൂപത്തില്‍ ലോകമെങ്ങും പ്രസിധീകരിക്കുന്നു.
        'പൂഞ്ഞാര്‍ ന്യൂസ് ' എന്ന ന്യൂസ് ബ്ലോഗിലൂടെ പൂഞ്ഞാര്‍ ഗ്രാമത്തിന്റെ വിശേഷങ്ങള്‍  അതാതു ദിവസങ്ങളില്‍ തന്നെ നിങ്ങളുടെ വിരല്‍ത്തുമ്പില്‍ എത്തുന്നു. യു.പി.,ഹൈസ്കൂള്‍ ക്ലാസുകളിലായി പഠിക്കുന്ന അറുപതോളം മിടുക്കരാണ് ഈ ന്യൂസ് ബ്ലോഗിനു പിന്നില്‍ പ്രവര്‍ത്തിക്കുന്നത്.
പ്രാദേശിക റിപ്പോര്‍ട്ടര്‍മാര്‍
       അന്റോണിയന്‍ ക്ലബ് അംഗങ്ങള്‍ തങ്ങള്‍ താമസിക്കുന്ന പ്രദേശത്തെ അടിസ്ഥാനമാക്കി  പല ഗ്രൂപ്പുകളായി പ്രവര്‍ത്തിക്കുന്നു. ഇവര്‍ പ്രാദേശിക റിപ്പോര്‍ട്ടര്‍മാര്‍ എന്ന നിലയില്‍ തങ്ങളുടെ പ്രദേശത്തെ വാര്‍ത്തകള്‍ റിപ്പോര്‍ട്ട് ചെയ്യുന്നു. പ്രദേശത്തെ ഗ്രാമപഞ്ചായത്ത് വാര്‍ഡ് മെമ്പര്‍മാരും PTA എക്സിക്കൂട്ടീവ് മെമ്പര്‍മാരും ഈ പ്രവര്‍ത്തനങ്ങളില്‍ സഹായിക്കുന്നു.
 എഡിറ്റോറിയല്‍ ബോര്‍ഡ്
      സ്കൂളില്‍ എത്തുന്ന വാര്‍ത്തകള്‍ അധ്യാപകരും വിദ്യാര്‍ത്ഥികളും അടങ്ങുന്ന എഡിറ്റോറിയല്‍ ബോര്‍ഡ് പ്രസിധീകരണയോഗ്യമാക്കുന്നു. എല്ലാ ദിവസവും സ്കൂള്‍ സമയത്തിനുശേഷം ഒരു മണിക്കൂര്‍ സമയം ഇതിനായി ചിലവഴിക്കുന്ന ക്ലബ് അംഗങ്ങള്‍, വാര്‍ത്തകള്‍ അന്നന്നു തന്നെ ബ്ലോഗില്‍  പ്രസിധീകരിക്കുന്നു.

Friday, November 26, 2010

പാചകവാതക ഉപയോക്താക്കളുടെ ശ്രദ്ധക്ക്

      കോട്ടയം : കോട്ടയം ജില്ലയിലെ എല്ലാ പാചകവാചതക ഉപയോക്താക്കളും ഡിസംബര്‍ 31-നകം റേഷന്‍ കാര്‍ഡ് , തിരിച്ചറിയല്‍ കാര്‍ഡ് , കസ്റ്റ്മര്‍ കാര്‍ഡ് എന്നിവയുമായി അതാത് ഏജന്‍സികളില്‍ എത്തി മുദ്രവെച്ച് വാങ്ങേണ്ടതാണെന്ന് ജില്ലാ കളക്ടര്‍ ഉത്തരവിട്ടു. മുദ്ര പതിപ്പിക്കാത്ത ഉപഭോക്താക്കള്‍ക്ക് ഡിസംബര്‍ 31-ന് ശേഷം റീഫില്‍ നല്‍കില്ല. ഉപഭോക്താക്കളുടെ പേരില്‍ വ്യാജ കാര്‍ഡുകള്‍ വ്യാപകമായതിന്റെ പശ്ചാത്തലത്തിലാണ് പുതിയ ഉത്തരവ്.

Monday, November 22, 2010

ഗ്രാമപഞ്ചായത്ത് ജനപ്രതിനിധികള്‍ക്ക് സ്വീകരണം

                 പൂഞ്ഞാര്‍കര്‍ഷകവേദിയുടെയും ഭൂമികയുടെയും ആഭിമുഖ്യത്തില്‍ പൂഞ്ഞാര്‍ തെക്കേക്കര ഗ്രാമപഞ്ചായത്ത് ജനപ്രതിനിധികള്‍ക്ക് സ്വീകരണം നല്‍കി.
                 ത്രിതല പഞ്ചായത്ത് തെരഞ്ഞെടുപ്പില്‍ പൂഞ്ഞാര്‍ തെക്കേക്കര ഗ്രാമപഞ്ചായത്തില്‍ നിന്നും ജനവിധിനേടി തെരഞ്ഞെടുക്കപ്പട്ട 14 ഗ്രാമപഞ്ചായത്ത് പ്രതിനിധികള്‍ക്കും ബ്ലോക്ക് പ്രതിനിധികള്‍ക്കും ജില്ലാപ്രതിനിധിക്കും കര്‍ഷകവേദിയുടെയും ഭൂമികയുടെയും ആഭിമുഖ്യത്തില്‍ 2010 നവംബര്‍ 21 [ഞായര്‍] - ന് ഉച്ചകഴിഞ്ഞ് 3 മണിക്ക് പൂഞ്ഞാര്‍ ഭൂമിക സെന്ററില്‍ സ്വീകരണം നല്‍കി.
                 ജനങ്ങളുടെ അംഗീകാരം ലഭിച്ച പഞ്ചായത്ത് അംഗങ്ങളെ അനുമോദിക്കുന്നതിനും നിര്‍മ്മാണാത്മകമായി ആശയവിനിയോഗം നടത്തുന്നതിനും വേണ്ടി സംഘടിപ്പിച്ച യോഗത്തില്‍ കര്‍ഷകവേദി സംസ്ഥാന പ്രസിഡന്റ്  കെ.ഒ.ജോസഫ് മുഖ്യ അതിഥിയായിരുന്നു.

Saturday, November 20, 2010

ബേബി രാജശ്രീ അരങ്ങേറ്റം കുറിച്ചു

            പൂഞ്ഞാര്‍ : ബേബി രാജശ്രീയുടെ സംഗീതകച്ചേരി അരങ്ങേറ്റത്തിന് പൂഞ്ഞാര്‍ തെക്കേക്കര പള്ളികുന്നേല്‍ ഭഗവതിക്ഷേത്രാങ്കണം വേദിയായി. ക്ഷേത്രത്തിലെ അശ്വതി,ഭരണി,കാര്‍ത്തിക മഹോത്സവത്തോടനുബന്ധിച്ചാണ് ചടങ്ങ് നടന്നത്.
              രണ്ടുമണിക്കൂര്‍ നീണ്ട അരങ്ങേറ്റത്തില്‍ രാജശ്രീ തീര്‍ത്ത സംഗീതപ്രപഞ്ചം ശ്രോതാക്കളെ അത്ഭുതപ്പെടുത്തി. അരങ്ങേറ്റക്കാരിയുടെ യാതൊരു പരിഭ്രമവുമില്ലാതെ എല്ലാവരുടെയും കൈയടി ഏറ്റുവാങ്ങിയ പ്രകടനമാണ് ഈ പതിനൊന്നുവയസുകാരി കാഴ്ചവച്ചത്.
              പൂഞ്ഞാര്‍ വടക്കേല്‍ രാജശേഖരന്റെയും (പ്യാരി) ബീനയുടെയും മകളായ രാജശ്രീ , തീക്കോയി രാധാകൃഷ്ണന്റെ കീഴില്‍ സംഗീതം അഭ്യസിച്ചുവരുന്നു.  പൂഞ്ഞാര്‍ സെന്റ് ആന്റണീസ് ഹയര്‍ സെക്കന്‍ഡറി സ്കൂളിലെ ആറാം ക്ലാസ് വിദ്യാര്‍ത്ഥിനിയാണ്.

ചെണ്ടമേളം അരങ്ങേറ്റം നടന്നു

          അമ്പാറ കുട്ടനാശാന്റെ കീഴില്‍ മേളം അഭ്യസിച്ച പൂഞ്ഞാറിലെ 15-ല്‍ പരം കലാകാരന്‍മാര്‍ പൂഞ്ഞാര്‍ പള്ളികുന്നേല്‍ ഭഗവതിക്ഷേത്രനടയില്‍ ചെണ്ടമേള അരങ്ങേറ്റം നടത്തി.പൂഞ്ഞാര്‍ തെക്കേക്കര പള്ളികുന്നേല്‍ ഭഗവതിക്ഷേത്രത്തിലെ അശ്വതി,ഭരണി,കാര്‍ത്തിക മഹോത്സവത്തോടനുബന്ധിച്ചാണ് അരങ്ങേറ്റം നടന്നത്.

Saturday, November 13, 2010

ദേശീയ അദ്ധ്യാപക അവാര്‍ഡ് കരസ്തമാക്കിയ പി. ഡി. ബേബിസാറിന് നാടിന്റെ ആദരം...

  • പൂഞ്ഞാര്‍ ഗ്രാമവും സെന്റ് ആന്റണീസ് കുടുംബവും ഒന്നു ചേര്‍ന്ന് , ദേശീയ അദ്ധ്യാപക അവാര്‍ഡ് കരസ്തമാക്കി  നാടിന്റെ യശസ്സുയര്‍ത്തിയ ബേബിസാറിനെ ആദരിച്ചു.
  • കേന്ദ്ര കൃഷിവകുപ്പ് സഹമന്ത്രി കെ. വി. തോമസ് ചടങ്ങില്‍ മുഖ്യാതിഥിയായിരുന്നു.



  • ആന്റോ ആന്റണി MP , പി. സി. ജോര്‍ജ്ജ് MLA , പ്രൊവിന്‍ഷ്യാള്‍ ഫാ. സെബാസ്റ്റ്യന്‍ ഇലഞ്ഞിക്കല്‍ CMI , കോര്‍പറേറ്റ് മാനേജര്‍ ഫാ.തോമസ് വെങ്ങാലുവക്കേല്‍ CMI , സ്കൂള്‍മാനേജര്‍ ഫാ. സേവ്യര്‍ കിഴക്കേമ്യാലില്‍ CMI ,ജില്ലാ പഞ്ചായത്ത്  മെമ്പര്‍ അഡ്വ. മോഹന്‍ തോമസ് ,  ബ്ലോക്ക് പഞ്ചായത്ത്  മെമ്പര്‍ ചിന്നമ്മ ഇമ്മാനുവേല്‍ പൂണ്ടിക്കുളം , പൂഞ്ഞാര്‍ തെക്കേക്കര ഗ്രാമപഞ്ചായത്ത് പ്രസിഡന്റ് ജെസ്സി ജോസ് , വാര്‍ഡ് മെമ്പര്‍ ശാന്തമ്മ രാമചന്ദ്രന്‍ , AEO ജയമോഹന്‍ , PTA പ്രസിഡന്റ് M C മാത്യൂസ് മുതിരേന്തിക്കല്‍ , ജനപ്രതിനിധികള്‍ , അദ്ധ്യാപക - വിദ്യാര്‍ദ്ധി പ്രതിനിധികള്‍ തുടങ്ങിയവര്‍ അനുമോദനങ്ങളര്‍പ്പിച്ച് സംസാരിച്ചു.

പി. ഡി. ബേബിസാറിലൂടെ ദേശീയ അദ്ധ്യാപക അവാര്‍ഡ് പൂഞ്ഞാര്‍ ഗ്രാമത്തിലേയ്ക്ക്...

  • മികച്ച അദ്ധ്യാപകനുള്ള ദേശീയ അദ്ധ്യാപക അവാര്‍ഡിന് പൂഞ്ഞാര്‍ സെന്റ് ആന്റണീസ് ഹയര്‍ സെക്കന്ററി സ്കൂള്‍ അദ്ധ്യാപകനായ പി. ഡി. ബേബി അര്‍ഹനായി.
  • അദ്ധ്യാപക ദിനമായ സെപ്റ്റംബര്‍ 5-ന് ഡല്‍ഹിയില്‍ നടന്ന ചടങ്ങില്‍ രാഷ്ട്രപതി പ്രതിഭാ പാട്ടീലില്‍ നിന്നും അദ്ദേഹം അവാര്‍ഡ് ഏറ്റുവാങ്ങി.
  • കഴിഞ്ഞ 25 വര്‍ഷമായി വിദ്യാഭ്യാസ മേഖലയിലെ സജീവ സാന്നിധ്യമാണ് ബേബിസാര്‍.
  • യു. പി. , ഹൈസ്കൂള്‍ ക്ലാസുകളിലെ സയന്‍സ് പുസ്തകങ്ങളുടെ രചനയില്‍ അദ്ദേഹവും പങ്കാളിയാണ്.
  • സയന്‍സ് വിഷയത്തിലെ പ്രഗത്ഭനായ സംസ്ഥാനതല പരിശീലകന്‍ , പാഠ്യ-പാഠ്യേതര പ്രവര്‍ത്തനങ്ങളിലും പാഠ്യപദ്ധതി പരിഷ്കരണത്തിലും നിരവധി സംഭാവനകള്‍ നല്‍കിയ വ്യക്തി , ദിനപത്രങ്ങളില്‍ സയന്‍സ് കോളങ്ങളിലെ എഴുത്തുകാരന്‍ തുടങ്ങിയ നിലകളിലും പി. ഡി. ബേബിസാര്‍ പ്രശസ്തനാണ്.

    Monday, November 8, 2010

    കപ്പേള വെഞ്ചരിച്ചു

    പൂഞ്ഞാര്‍ :  സെന്റ് ആന്റണീസ് സ്കൂളിന്റെയും പൂഞ്ഞാര്‍ ചെറുപുഷ്പാശ്രമത്തിന്റെയും  മുന്‍പിലായി പണിതീര്‍ത്ത  ആശ്രയ മാതാ കപ്പേളയുടെ വെഞ്ചരിപ്പ് , പാലാ രൂപത അദ്ധ്യക്ഷന്‍ മാര്‍ ജോസഫ് കല്ലറങ്ങാട്ട് നിര്‍വഹിച്ചു.